Memlekettik rámizderge jaýapkershilik kúsheıtilmek

ASTANA. KAZINFORM — «Qazaqstan Respýblıkasynyń memlekettik rámizderi týraly» Konstıtýtsııalyq zańyna jáne «Ákimshilik quqyq buzýshylyq týraly» kodeksine ózgerister men tolyqtyrýlar engizilmek. Bul týraly Mádenıet jáne aqparat vıtse-mınıstri Qanat Ysqaqov málim etti.

— Búginde mınıstrlik 2025 jylǵy 27 naýryz kúni Atyraý oblysynda Qazaqstan Respýblıkasynyń memlekettik rámizderin, onyń ishinde memlekettik týdy qorlaý faktisi boıynsha Atyraý oblysynyń ishki ister departamentimen, Іshki saıasat basqarmasymen birlesip túsindirý jumystaryn júrgizildi. Atap aıtqanda, saýda úılerinde, kınoteatrlarda, halyq kóp shoǵyrlanatyn jerlerde arnaıy beınerolıkter arqyly aqparattyq nasıhattalyp jatyr, — dep jaýap berdi agenttik joldaǵan resmı saýalǵa Qanat Ysqaqov. 

Odan bólek, mınıstrlik «Ozon.kz», «Wildberries.kz», «Temu.kz» halyqaralyq onlaın platformalaryna, «Kaspi.kz» «Halyk.kz» «Jusan.kz» «Freedom.kz» banki jáne basqa da qazaqstandyq ınternet dúkenderine resmı hat joldap, túsindirý jumystaryn uıymdastyrǵan.

— Sonymen qatar, qoldanystaǵy «Qazaqstan Respýblıkasynyń memlekettik rámizderi týraly» Qazaqstan Respýblıkasynyń 2007 jylǵy 4 maýsymdaǵy № 258 Konstıtýtsııalyq zańyna jáne «Ákimshilik quqyq buzýshylyq týraly» Qazaqstan Respýblıkasy Kodeksiniń 458-babyna ózgerister men tolyqtyrýlar engizý kózdelgenin málimdeımiz, — deıdi ol.

Eske salsaq, bıyl naýryzda Atyraýda ózge tilde jazylǵan jazýy bar memlekettik týmen fotoǵa túskender ustaldy. Artynsha, áleýmettik jelide taralǵan fotoǵa baılanysty memlekettik rámizderdi qorlaý babymen qylmystyq is qozǵaldy.

Sondaı-aq memlekettik týdy qorlaǵan atyraýlyqtyń biri 15 táýlikke qamaýǵa alyndy. 
Aıta keteıik, quqyq buzýshylardyń 2-eýi kámeletke tolmaǵan jasóspirim. Sot qaýlysymen kámeletke tolmaǵan A.-nyń zańdy ókiline ákimshilik jaza retinde 39 myń 320 teńge ákimshilik aıyppul salyndy.