Memlekettik rámizderdi paıdalaný qaǵıdalary jańartyldy
ASTANA. KAZINFORM – Qazaqstan Respýblıkasynyń memlekettik rámizderiniń mártebesi men olardy paıdalaný tártibi Konstıtýtsııamen, «Qazaqstan Respýblıkasynyń memlekettik rámizderi týraly» Konstıtýtsııalyq zańmen jáne Úkimettiń ózge de normatıvtik quqyqtyq aktilerimen retteledi.
Memlekettik rámizderdi paıdalaný tártibin jetildirý jáne olarǵa degen qurmetti nyǵaıtý maqsatynda Mádenıet jáne aqparat mınıstrligi Úkimettiń Memlekettik Týdy, Memlekettik Eltańbany jáne olardyń beınelerin, sondaı-aq Memlekettik Gımn mátinin paıdalaný, ornatý jáne ornalastyrý qaǵıdalaryn bekitetin qaýlysyna ózgerister engizgenin habarlady.
Engizilgen ózgeristerdiń biri termınologııany birizdendirýge baǵyttalǵan. Budan bylaı normatıvtik quqyqtyq aktilerde «Gımn» ataýynyń ornyna «Ánuran» ataýy qoldanylady. Sonymen qatar jeke jáne zańdy tulǵalardyń Memlekettik Týdy ornalastyrý tártibi naqtylandy. Endi Týdy ǵımarattarǵa, onyń ishinde balkondarǵa da 45 gradýs buryshpen ilýge bolady. Bul norma 2020 jyldan beri zańnamada bolǵanymen, balkonǵa ornalastyrý tártibi osy ýaqytqa deıin naqty aıqyndalmaǵan edi.
Qaǵıdalarǵa Memlekettik Týdy paıdalanýǵa qatysty birqatar talaptar da engizildi. Jeke turǵyn úılerde Tý jerden keminde úsh metr bıiktikte ornatylýy kerek. Endi túngi jaryqtandyrý talaby alynyp tastaldy. Al eger ǵımarattyń sáýlettik nemese tehnıkalyq erekshelikterine baılanysty Týdy qasbetke ornalastyrý múmkin bolmasa, ony úı aýmaǵyndaǵy jeke tý tuǵyryna (flagshtokqa) ornatýǵa bolady. Memlekettik Tý jerge, edenge, sýǵa nemese ózge de zattardyń betine tımeýi tıis. Tý tik ornalastyrylǵan jaǵdaıda ulttyq órnek matanyń joǵarǵy jaǵynda bolýy qajet. Sondaı-aq Memlekettik Týdy eger olar kommertsııalyq maqsat kózdemese, jeke jáne zańdy tulǵalar uıymdastyratyn mádenı, sporttyq, qoǵamdyq jáne ózge de is-sharalarda paıdalanýǵa bolady. Tý ulttyq standartqa tolyq sáıkes bolýy tıis. Óńi ketken, jyrtylǵan, kirlegen nemese ózge de zaqymdary bar Memlekettik Týdy paıdalanýǵa tyıym salynady.
Sondaı-aq memlekettik rámizder týraly zańnama talaptary saqtalǵan jaǵdaıda Memlekettik Týdy kólik salonynda paıdalanýǵa ruqsat etiledi. Memlekettik Týdy ádeıi búldirýge, joıýǵa, órteýge, jyrtýǵa, jerge tastaýǵa, maqsatqa saı emes qoldanýǵa jáne onyń memlekettik rámiz retindegi qadir-qasıeti men mártebesine nuqsan keltiretin kez kelgen áreketke jol berilmeıdi.
Qaǵıdalarda Memlekettik Týdy jarnamalyq maqsatta paıdalanýǵa, sondaı-aq ony kıim-keshek, tósek-oryn jabdyqtary, perde, dastarqan, tósenish jáne turmystyq maqsattaǵy ózge de buıymdarǵa ornalastyrýǵa tyıym salynǵan. Bul talap memlekettik rámizdiń beınesin kúndelikti turmysta orynsyz paıdalanýdyń aldyn alyp, oǵan degen qurmetti saqtaýǵa baǵyttalǵan.
Sonymen birge engizilgen ózgeristerge sáıkes, Memlekettik Týdyń beınesin sportshylardyń kıimi men jabdyqtarynda qoldanýǵa ruqsat etildi. Buǵan deıin zańnamada sporttyq kıimde tek Memlekettik Eltańbanyń beınesin ornalastyrýǵa ǵana múmkindik berilse, endi bul quqyq Memlekettik Týdyń beınesine de qoldanylatyn boldy. Sporttyq kıim men jabdyqtarǵa fýtbolkalar, sporttyq kostıýmder, beısbolkalar, kepkalar jáne sportshylar paıdalanatyn ózge de kıim úlgileri jatady. Engizilgen ózgerister memlekettik rámizderdi paıdalaný tártibin birizdendirýge, olarǵa degen qurmetti arttyrýǵa jáne azamattar, uıymdar, sportshylar men kásipkerler úshin ortaq talaptardy aıqyndaýǵa múmkindik beredi.
Aıta keteıik, Astanada Memlekettik rámizder kúni dúnıege kelgen sábılerdiń ata-analaryna syılyqtar tabystaldy.
