Memlekettik rámizderdi qadirlep paıdalanatyn otanshyl azamattardy barynsha qoldaý qajet - Toqaev

QYZYLORDA. KAZINFORM – Memlekettik rámizderdi paıdalanýǵa jeńil-jelpi, salǵyrt qaraýǵa bolmaıdy. Bul týraly Memleket basshysy Qasym-Jomart Toqaev Qyzylorda qalasynda ótip jatqan Ulttyq quryltaıdyń V otyrysynda aıtty.

- Otanshyldyq degenimiz – árıne, Otanǵa degen súıispenshilik degen sóz. Alaıda, Otan aldyndaǵy jaýapkershiligińdi sezinip, perzenttik paryzyńdy óteýge talpynbasań, «otanshylmyn, patrıotpyn» degen sózińniń quny kók tıyn bolmaq. Qazir qoǵamda «Qazaqstannyń memlekettik Týyn qaıda jáne qashan qoldanǵan jón?» degen mańyzdy másele talqylanyp jatyr. Bul másele arnaıy normalarmen jáne erejelermen retteledi. Memlekettik rámizderdi paıdalanýǵa jeńil-jelpi, salǵyrt qaraýǵa bolmaıdy. Zań talaby árdaıym oryndalýǵa tıis, - dedi Qasym-Jomart Toqaev. 

Osy oraıda Prezıdent zańnyń túpki mánin tereń túsiný mańyzdy ekenin aıtty.

- Memlekettik rámizderdi qadirlep, olardy jónimen paıdalanatyn otanshyl azamattardy barynsha qoldaý qajet, - dedi Memleket basshysy.

Aıta keteıik, Prezıdenttiń paıymynsha, Qazaqstan eńbeksúıgish azamattar eli, Ádilet, Zań jáne Tártip aýmaǵy bolýy kerek.