Memlekettik rámizder týraly konstıtýtsııalyq erejeler jetildirildi

ASTANA. KAZINFORM – Bul týraly búgin Konstıtýtsııalyq reformalar jónindegi komıssııanyń kezekti otyrysynda Konstıtýtsııalyq sot tóraǵasynyń orynbasary Baqyt Nurmuhanov málim etti. 

– Qazirgi zamanǵy syn-qaterlerdi eskere otyryp, qoǵamdyq birlestikterdiń qyzmetin jáne olardyń memleket pen ózara is-qımylyn retteıtin konstıtýtsııalyq normalar naqtylandy. Memleket pen din arasyndaǵy qarym-qatynas, Memlekettik rámizder týraly konstıtýtsııalyq erejeler jetildirildi. «Negizgi quqyqtar, bostandyqtar men mindetter» bóliminiń jańa ataýy onda kózdelgen erejelerdiń mánin barynsha tolyq kórsetedi. Usynylyp otyrǵan jańashyldyqtar adam quqyqtary men bostandyqtarynyń iske asyrylýy men qorǵalýy kepildikterin kúsheıtedi. Halyqaralyq jalpy tanylǵan ustanymdardy eskere otyryp, olardyń mazmunyn tolyqtyrady. Sondaı-aq ozyq konstıtýtsııalyq tájirıbege súıene otyryp, jeke tulǵa mindetteriniń ózegin naqtylaıdy, - dedi Baqyt Nurmuhanov.

Budan buryn habarlanǵandaı, búgin Konstıtýtsııalyq reformalar jónindegi komıssııanyń (Konstıtýtsııalyq komıssııa) tórtinshi otyrysy ótti. 

Kazinform agenttiginiń saıtynda ádettegideı otyrystan tikeleı efır uıymdastyryldy.