Memlekettik rámizder kúni Astanada qandaı is-sharalar ótedi
ASTANA. KAZINFORM – Astanada Memlekettik rámizder kúninde birqatar is-sharalar ótkizý josparlanyp otyr. Olardyń arasynda chellendj, kórme, túrli aktsııalar, merekelik kontsert jáne t.b. bar, dep jazdy elorda ákimdiginiń resmı saıty.
4 maýsym kúni Qalamgerler alleıasynda «Kitap qala» ashyq aspan astyndaǵy kitaphana bazasynda «Memlekettik rámizder – ulttyń aıshyqty tańbasy» taqyrybynda kitap kórmesi uıymdastyrylady.
Bul kúni saǵat 14.00-16.00 aralyǵynda «Baıterek» monýmenti aldynda «Men – Qazaqstannyń patrıotymyn!» áskerı-mýzykalyq patrıottyq sherý ótedi.
Sondaı-aq, qalalyq Arbat pen qalalyq ortalyq saıabaǵynda «Rámizderim – aıbynym» aktsııasy ótedi. Onyń aıasynda qala turǵyndaryna memlekettik jalaýshalar taratylyp, vıktorına oınatylady jáne qatysýshylarǵa syılyqtar tabystalady.
Saǵat 19:00-de qalalyq arbatta «Meniń elim!» patrıottyq ánder sherýi ótedi.
Áleýmettik jelilerde Qazaqstan Respýblıkasynyń Memlekettik rámizder kúnine arnalǵan vırtýaldy kórme ótedi.
Bilim berý mekemeleri men uıymdarynda birqatar is-shara ótpek. Olar: «Men – Qazaqstan Respýblıkasynyń azamatymyn» pikirsaıysy, QR Memlekettik rámizderi taqyrybyna arnalǵan olımpıada, «Memlekettik rámizder – eldigimizdiń nyshany» tanymdyq saǵattary, «Elimniń rámizderi» jas aqyndar baıqaýy, «Atameken» atty patrıottyq óleńder oryndaý boıynsha chellendj, «El rámizderi – el rýhy» kitap kórmesi, «Elimniń Rámizder kúni» balalar jumystarynyń qalalyq kórmesi, «Memlekettik rámizder – ult maqtanyshy» kontserttik baǵdarlamasy, «Rámizderim – maqtanyshym!» merekelik kontserti uıymdastyrylady.
Sonymen qatar 3-4 maýsym kúnderi Qazaqstan Respýblıkasy Memlekettik rámizder kúnine oraı memlekettik jáne baǵynysty mekemelerde «Men –Qazaqstannyń patrıotymyn!» merekelik is-sharalary josparda bar.
Memlekettik mekemeler, aýmaqtyq organdar, baǵynysty uıymdar jáne t.b. arasynda «Meniń rámizderim – meniń maqtanyshym!» jalpyqalalyq patrıottyq aktsııa-chellendji ótedi.
Áleýmettik jelilerde bir ýaqytta Memlekettik Týdyń tusynda túsken sýret ornalastyra otyryp, «Meniń týym – meniń maqtanyshym!» jalpyulttyq chellendji uıymdastyrylady.
Maýsymnyń alǵashqy kúnderinen bastap, «Týymyz - tórimizde!» patrıottyq aktsııa ótkizilip jatyr. Onyń aıasynda QR Memlekettik týlaryn turǵyn úıler men ǵımarattardyń balkondary men terezelerinde jelbiretý is-sharasy qolǵa alyndy. Jalpy 1000 jýyq Memlekettik Tý turǵyn úılerge ilindi.
