Memlekettik rámizderi kúni: Astanada 500-ge jýyq is-shara ótedi

ASTANA. KAZINFORM – Bıyl 4 maýsym – Qazaqstan Respýblıkasynyń Memlekettik rámizderi kúnine oraı elordada keń kólemdi patrıottyq baǵyttaǵy is-sharalar uıymdastyrylady.

«Meniń rámizderim – meniń maqtanyshym!» atty aktsııa aıasynda qala aýmaǵyndaǵy memlekettik organdarda, aýmaqtyq departamentterde, sot mekemelerinde, bilim berý uıymdarynda jáne basqa da mekemelerde 500-den astam patrıottyq is-shara ótkizý josparlanyp otyr. Bul týraly elordanyń Kommýnıkatsııalar qyzmetinde ótken brıfıngte Astana qalasynyń Tilderdi damytý jáne arhıv isi basqarmasynyń basshysy Sáken Esirkep málim etti.

Spıkerdiń aıtýynsha, Rámizder kúni aıasynda aqparattyq saǵattar, dóńgelek ústelder, konferentsııalar, dárister, semınarlar, kitap kórmeleri, kontsertter, shyǵarmashylyq baıqaýlar, velojarystar, patrıottyq aktsııalar, chellendjder jáne basqa da tárbıelik baǵyttaǵy is-sharalar josparlanǵan.

Memlekettik rámizderge kúnine oraı ótkiziletin saltanatty sharalar:

4 maýsym kúni Báıterek monýmenti alańynda ótetin «Meniń baıraǵym!» atty merekelik kontserti josparlanǵan.

Arnaıy ázirlengen 3 top qalanyń qoǵamdyq oryndarynda, kóshelerde kezdeısoq turǵyndarǵa, memlekettik rámizder jaıly vıktorınalyq suraqtar qoıylyp, belsendi qatysqandarǵa syılyqtar tabystaıdy.

«Báıterek» monýmenti alańynda kópshilik jınalǵanǵa deıin aspaptyq top ártúrli mýzykalyq kompozıtsııalardy oryndaıdy, uıymdastyrýshylar turǵyndardy jáne qonaqtardy quttyqtap, olarǵa jalaý taratady. Merekelik is-sharanyń negizgi ereksheligi bolyp jastar arasynda tanymal spıdkýbıng óneriniń sheberleri óz ónerlerin kórsetedi. Olardyń jyldam ári dál qımyldarymen Rýbık kýbıkterinen Qazaqstan týynyń beınesi qurastyrylady. Kontsert bastalar aldynda Qazaqstan Respýblıkasynyń Memlekettik Gımni oryndalady.

Bul kúni qalalyq Arbatta ashyq aspan astynda ótetin «Dombyra-party» ádebı-sazdy keshi ulttyq aspapty dáriptep, jastardyń mádenı muraǵa degen qurmetin arttyrýdy kózdeıdi. Árbir kesh qonaǵy óz ónerin ortaǵa salyp, shyǵarmashylyǵyn kópshilikke pash ete alady. Bul – án aıtý, óleń oqý nemese bı bıleý sekildi erkin formattaǵy óner túrleri bolýy múmkin. Óz ónerlerin kórsetken qatysýshylarǵa shara uıymdastyrýshylary tarapynan estelik syılyqtar tabystalady. Bul – eldik rámizderge degen qurmetti shyǵarmashylyqpen ushtastyratyn tamasha múmkindik», - deıdi Sáken Esirkep.

Basqarma basshysynyń aıtýynsha, jazǵy amfıteatrda Memlekettik rámizder kúnine arnap mektep oqýshylary men balalarǵa arnalǵan kontserttik oıyn-saýyq baǵdarlamasy ótedi.

«Týymyz tórimizde!» patrıottyq aktsııasy aıasynda qala kóshelerindegi ǵımarattar men turǵyn úılerdiń balkondaryna 400-den astam Memlekettik Tý ilinedi, al ortalyq saıabaqtar men qoǵamdyq oryndarda 5000-ǵa jýyq memlekettik jalaýsha turǵyndarǵa taratylady.

Saraıshyq aýdanynda saǵat 12.00-de R. Qoshqarbaev dańǵyly, 34 mekenjaıynda ornalasqan «Túrkistan» turǵyn úı kesheniniń jańartylǵan aýlasynyń saltanatty ashylýy ótedi. Merekelik sharanyń erekshe atmosferasyn Qazaqstan Respýblıkasy Qarýly Kúshteriniń Ortalyq áskerı-patrıottyq ortalyǵynyń Ortalyq áskerı orkestri óner kórsetip, jandandyrady. Sondaı-aq, is-shara aıasynda «Terezedegi Tý» atty patrıottyq aktsııa ótedi. Atalǵan turǵyn úı kesheniniń turǵyndary óz páterleriniń terezelerine Memlekettik týdy ilip, Otanǵa degen súıispenshilikteri men azamattyq ustanymdaryn bildire alady.

Merekege oraı sporttyq jıyndar da, jastarǵa arnalǵan is-sharalar da uıymdastyrylady.

Mereke kúnderi M.Ótemisuly atyndaǵy Oqýshylar saraıynda «Elińniń rámizderin bilesiń be?» atty patrıottyq kýız jáne «Birlik týynyń astyndaǵy jas Qazaqstan daýysy!» atty mektep kóshbasshylarynyń manıfesi ótedi.
4 maýsymda «Kók týdyń jelbiregeni» atty lektsııa-kontsertte Memlekettik Tý týraly mýzykalyq qoıylymdar usynylady.

Sonymen qatar, «Tarıhtan týǵan rámizder» beıne-vıktorınasy, Tuńǵysh Prezıdent kitaphanasyna jáne Táýelsizdik monýmentine ekskýrsııalar ótedi.

4 maýsymda Jazǵy lagerlerde «Qazaqstan – altyn besigim» atty patrıottyq ánder saıysy uıymdastyrylady.

Aıta keteıik, buǵan deıin memlekettik rámizderge jaýapkershilik kúsheıtiletinin jazǵanbyz.