Memlekettik organnyń sheshimimen kelispegen azamat óz quqyǵyn qalaı qorǵaı alady

Bul týraly Astana qalasynyń mamandandyrylǵan aýdanaralyq ákimshilik sotynyń sýdıasy Adına Jarkenova qalalyq kommýnıkatsııalar qyzmetinde ótken baspasóz májilisinde aıtty.

Sýdıanyń sózinshe, Qazaqstan Respýblıkasynyń Ákimshilik rásimdik-protsestik kodeksi (ÁRPK) memlekettik organdar qabyldaıtyn sheshimderdiń zańdylyǵyn qamtamasyz etýge jáne azamattar men memlekettik organdar arasyndaǵy daýlardy ádil sheshýge baǵyttalǵan.

— Atap aıtqanda, kodekstiń 7-babynda zańdylyq qaǵıdaty bekitilgen. Oǵan sáıkes, memlekettik organdar men laýazymdy adamdar óz ókilettikteri sheginde jáne zań talaptaryna saı áreket etýge mindetti. Sondyqtan ákimshilik sot memlekettik organnyń belgili bir sheshim qabyldaýǵa quqyǵy bolǵanyn ǵana emes, ony qabyldaý kezinde zańda belgilengen rásimderdiń saqtalǵanyn da tekseredi, — dedi spıker.

Sonymen qatar ol ÁRPK-niń 8-babynda kózdelgen ádildik qaǵıdaty ákimshilik isterdi jan-jaqty ári beıtarap qaraýdy talap etetinin atap ótti.

— Bul azamattardyń ótinishterin ústirt qaraýǵa, bir taraptyń ustanymyna aldyn ala basymdyq berýge nemese istiń nátıjesine áser etetin mańyzdy mán-jaılardy elemeýge jol berilmeıtinin bildiredi, — dedi sýdıa.

Adına Jarkenovanyń aıtýynsha, memlekettik organdar azamattardyń quqyqtaryn shekteıtin sheshim qabyldaǵan kezde mólsherlestik qaǵıdatyn da saqtaýǵa tıis. Kodekstiń 10-babyna sáıkes, qoldanylatyn sharalar kózdelgen maqsatqa saı bolýy jáne azamattardyń quqyqtaryn shamadan tys shektemeýi qajet.

— Budan bólek, ÁRPK-niń 12-babynda ákimshilik rásimder týraly zańnamadaǵy kúmándar, qaıshylyqtar men túsiniksizdikter ákimshilik rásimge qatysýshynyń paıdasyna túsindiriletini kórsetilgen. Al 13-bap azamattardyń memlekettik organdardyń zańdy sheshimderi men áreketterine degen senimin qorǵaýdy kózdeıdi, — dedi spıker.

Ol ákimshilik sot tóreliginiń basty mindeti memlekettik organnyń sheshimin jaı ǵana kúshinde qaldyrý nemese kúshin joıý emes, daýdy zań talaptaryna sáıkes ádil sheshý ekenin atap ótti.

— Bul rette azamattyń sotqa júginýi onyń talaby mindetti túrde qanaǵattandyrylady degen sóz emes. Sot istiń barlyq mán-jaıyn zerttep, azamattardyń quqyqtary men qoǵamdyq múddeler arasyndaǵy tepe-teńdikti saqtaýǵa tıis, — dedi Adına Jarkenova.

Sýdıa azamattardy óz quqyqtaryn bilýge, memlekettik organdar qabyldaıtyn sheshimderge muqııat qaraýǵa jáne quqyqtary buzylǵan jaǵdaıda zańda kózdelgen sot arqyly qorǵaý múmkindikterin paıdalanýǵa shaqyrdy.

Aıta keteıik, buǵan deıin Astanada jyl basynan beri 4 jeke sot oryndaýshysy lıtsenzııasynan aıyrylǵany habarlandy.