Memlekettik organnyń atyn jamylǵan alaıaqtar: qazaqstandyqtarǵa mańyzdy eskertý jasaldy

ASTANA. KAZINFORM — Qazaqstandyqtardy Qarjy naryǵyn retteý jáne damytý agenttiginiń qyzmetkerleri bolyp tanystyratyn alaıaqtardan saq bolýǵa shaqyrdy. Qaskóıler azamattardyń aqshasyn ıemdený úshin túrli syltaýmen aldyn ala tólem talap etedi.

Memlekettik organnyń atyn jamylǵan alaıaqtar: qazaqstandyqtarǵa mańyzdy eskertý jasaldy
Foto: Qarjy naryǵyn retteý jáne damytý agenttigi

Alaıaqtar ózderin Agenttik qyzmetkerleri retinde tanystyrady nemese azamattardy adastyrý, memlekettik organmen resmı ózara is-qımyldyń kórinisin jasaý jáne osy syltaýmen qolma-qol aqshany ıemdený úshin onyń qyzmetkerleriniń aty-jónderin paıdalanady.

Agenttik bul áreketterge qatysy joq ekenin resmı túrde málimdeıdi. Agenttik qyzmetkerleriniń aty-jóni men laýazymdaryn paıdalaný usynylatyn operatsııalardyń zańdylyǵyn kórsetpeıdi jáne qolma-qol aqshany qaıtarýǵa kepildik bermeıdi.

Osyǵan baılanysty Agenttik azamattardyń nazaryn mynalarǵa aýdarady: Agenttikte qarjylyq operatsııalardy júrgizýge, aqshalaı qarajatty qaıtarýǵa nemese ótemaqy alýǵa arnalǵan resmı Telegram-bottar joq. Agenttik qyzmetkerleri azamattardyń aqshalaı qarajatyn tartpaıdy, ınvestıtsııalyq ónimderdi usynbaıdy jáne komıssııalardy, ınkassatsııa alymdaryn nemese ózge de aldyn ala tólemderdi tóleýdi talap etpeıdi. Agenttik deldaldar, Telegram-bottar jáne bóten akkaýnttar arqyly azamattardyń aqshalaı qarajatyn qaıtarýdy júzege asyrmaıdy.

Agenttiktiń qyzmetkerleri tergeýdi súıemeldeý, qylmystyq qýdalaýdy toqtatý, qylmystyq isterdi retteý nemese Quqyq qorǵaý organdarynyń quzyretine jatatyn ózge de máselelerdi sheshý úshin taǵaıyndalmaıdy.

— Agenttikke aldyn ala tergeý, anyqtaý jáne jedel-izdestirý qyzmetin júrgizý ókilettikteri berilmegen, sondaı-aq jeke tulǵalarǵa qatysty qylmystyq ister boıynsha is júrgizýdi júzege asyrmaıdy. Agenttik qyzmetkerleri tergeýdi súıemeldeý, qylmystyq qýdalaýdy toqtatý, qylmystyq isterdi retteý nemese quqyq qorǵaý organdarynyń quzyretine jatatyn ózge de máselelerdi sheshý úshin taǵaıyndalmaıdy, — dep eskertti mamandar.

Agenttik belgili bir aqyǵa aqshalaı qarajatty qaıtarýǵa, qylmystyq qýdalaýdy toqtatýǵa, qylmystyq isterdi retteýge nemese Agenttik atynan qarjylyq operatsııalardy júrgizýge járdemdesýdiń kez kelgen usynysy yqtımal alaıaqtyqtyń belgileri bolyp tabylatynyn erekshe atap kórsetedi.

Alaıaqtyq áreketterdi bolǵyzbaý maqsatynda Agenttik azamattarǵa:

  • ózderin Agenttiktiń nemese ózge de memlekettik organdardyń qyzmetkerleri dep tanystyratyn adamdarǵa aqshalaı qarajatty aýdarmaýǵa;
  • aqshalaı qarajatty buǵattan sheshý, qaıtarý nemese aýdarý syltaýymen komıssııalardy, ınkassatsııa úshin alymdardy jáne ózge de tólemderdi tólemeýge;
  • ózderin Agenttiktiń resmı arnalary retinde tanystyratyn Telegram-bottarǵa, akkaýnttar men chattarǵa senbeýge;
  • jalǵan qozǵalǵan qylmystyq ister, taǵaıyndalǵan tergeýler nemese azamattarǵa Agenttik qyzmetkerleriniń bekitilgeni týraly habarlaıtyn adamdardyń talaptaryn oryndamaýǵa;
  • kelip túsetin aqparattyń durystyǵyn tek resmı derekkózder arqyly tekserýge;
  • SMS-habarlamalardan alynǵan derbes derekterdi, bank derektemelerin, qupııasózder men rastaý kodtaryn úshinshi tulǵalarǵa bermeýge;
  • kúdikti qońyraýlar men habarlamalar alǵan kezde olardy jóneltýshilermen qarjylyq qatynastarǵa túspeýge jáne osyndaı faktiler týraly quqyq qorǵaý organdaryna dereý habarlaýǵa qatań usynys beredi.

Agenttik azamattardy qyraǵylyq tanytýǵa jáne alaıaqtardyń memlekettik organdardyń ataýlaryn, laýazymdaryn jáne rámizderin paıdalanýy zańǵa qaıshy áreketterdi zańdy etip kórsetý tásilderiniń biri bolyp tabylatynyn este ustaýǵa shaqyrady.

Agenttiktiń qyzmeti týraly ózekti jáne anyq aqparat Agenttiktiń resmı ınternet-resýrsynda jáne áleýmettik jelilerdegi paraqshalarynda ornalastyrylady.

Eske sala keteıik, buǵan deıin alaıaqtar qazaqstandyqtarǵa zeınetaqy jınaqtaryn qolma-qol aqshaǵa aınaldyrýdy usyna bastaǵanyn jazǵan edik.

BJZQ málimetinshe, alaıaqtar salymshylarǵa telefon shalady nemese messendjerler arqyly habarlama jiberip, ózderin qor qyzmetkerleri retinde tanystyrady. Olar zeınetaqy jarnalary túspegenin, zeınetaqy qaıta esepteletinin nemese azamattarǵa qosymsha tólemder tıesili ekenin aıtyp, jalǵan aqparat taratady.