Memlekettik organdardy jeńilgen isterdiń sany boıynsha baǵalaý kerek — sýdıalar sezi
ASTANA. KAZINFORM — Joǵarǵy sot tóraǵasy Aslambek Merǵalıev memlekettik organdardy olarǵa qarsy joldanǵan talap-aryzdar sany boıynsha baǵalaýdy usyndy.
«Qoǵam ákimshilik sottarǵa senimmen qarap otyr. Qazirgi kezde sottar sheshimder men áreketterge nemese áreketsizdikke shaǵymdaný boıynsha talap-aryzdardyń 60 paıyzǵa deıingi bóligin qanaǵattandyryp otyr. Tek bir qaraǵanda bul optımıstik kórsetkish bolyp seziler. Degenmen, onyń negizinde ondaǵan jyldar boıy «eski erejeler» boıynsha jumys istegen memlekettik apparat pen Úkimet basshylyǵy eńserýi tıis júıeli syn-qater qamtylǵan», - dedi A. Merǵalıev Qazaqstan sýdıalarynyń sezinde.
Osy oraıda Joǵarǵy sot tóraǵasy memleket múddesi qandaı da bir memlekettik organnyń paıdasyna qalaı bolsa da sheshim qabyldaý emes ekenin atap ótti. Bul turǵyda zań boıynsha ádil sheshim jasaý mańyzdy bolady.
Aslambek Merǵalıev azamattar men bıznestiń máselelerin sheshýde memlekettik organdar men sheneýnikter jumysynyń sapasyn arttyrý basymdyǵyna toqtala kele, bul rette qyzmet kórsetýge jáne adamdarǵa baǵyttalǵan memlekettik qyzmetti qurý mańyzdy ekenin aıtty.
«Sondyqtan da memlekettik organdardyń jumysyn baǵalaýda jańa ındıkatordy engizýdi usynyp otyrmyz. Bul turǵyda árbir naqty memlekettik organǵa qatysty qansha talap-aryz joldanǵany, sondaı-aq olar qansha iste jeńilgeni eskerilgeni jón», - dedi Joǵarǵy sot tóraǵasy.
Budan buryn habarlanǵandaı, QR Prezıdenti Qasym-Jomart Toqaev Qazaqstan sýdıalarynyń sezine qatysty.
Memleket basshysy búginde sot isteriniń jartysynan astamy azamattar men bıznestiń paıdasyna sheshilip jatqanyn aıtty.
