Memlekettik organdarda «komandalyq aýysýǵa» qalaı tosqaýyl qoıyldy
ASTANA. KAZINFORM – Elimizdegi memlekettik qyzmet reformasyndaǵy basty baǵyt kásibı memlekettik qyzmetshilerdi qorǵaýǵa arnaldy. Bul týraly «Jibek Joly» telearnasynyń «Ýáde» baǵdarlamasyna suhbat bergen Astana memlekettik qyzmet haby basqarý komıtetiniń tóraǵasy Álıhan Baımenov aıtty.
- 1998 jyldan bastap júrgizilip kele jatqan memlekettik qyzmet reformasynyń eń ózekti baǵyty - ol kásibı memlekettik qyzmetshilerdi qorǵaý. Sol reformany 1999 jyly bastardyń aldynda, osy protseske jaýapty edim. Sol kezde Memlekettik qyzmet isteri agenttiginiń tuńǵysh tóraǵasy boldym. Osy aýqymdy jumys kezinde tıisti taldaý júrgizdik. Bul turǵyda 1996-1998 jyldary mınıstrler taǵaıyndalǵan kezde, keıde 2-3 aıda onyń apparatynyń 60 paıyzyna deıin aýysyp ketetini anyqtaldy. Sebebi, ol ýaqytta memlekettik qyzmetshiler zańmen qorǵalmaǵan, - dedi Á. Baımenov.
Osy oraıda ol 1999 jyly qabyldanǵan «Memlekettik qyzmet týraly» zańǵa arnaıy bap engizilgenin eske saldy.
- Bul rette, saıası memlekettik qyzmetshiniń aýysýy kásibı memlekettik qyzmetshiniń jumystan ketýine negiz bola almaıtynyn zańmen bekittik. 2013 jyly «A» korpýsy dep irikteý ótkizip, aýdan ákimderi, komıtet tóraǵalaryn 4 jyl kelisimshartqa otyrǵyzdyq. Olar 4 jyl kelisimsharttaǵy kórsetkishterge qol jetkizse, basshylar olardy jumystan bosata almaıdy. Bul qadamdar kásibı turaqtylyqqa baǵyttalǵan edi. Bizdiń qoǵamda óziniń quqyǵyn zań júzinde qorǵaý dástúri endi qalyptasyp keledi. Bul jaǵdaı tek memlekettik qyzmette emes, jalpy baǵyttardy aıtyp otyrmyn. Keıbir salalarda ol tezirek qalyptasty, ıaǵnı múlikke, jeke menshikke qatysty. Al qyzmetke qatysty baǵytta sál qalys kele jatyr. Olar neden qorqady? «Erteń bir pálege ilektirip jiberedi» degen úreı bolady. Ózderine senimsiz bolǵandyqtan, kúndelikti kúreske daıyn bolmaǵandyqtan, aryzyn jazyp, jumystan ketýdi jón sanaıdy. Atap aıtqanda, aryz jazbasa, olardy jumystan eshkim ketire almaıdy, - dedi Astana memlekettik qyzmet haby basqarý komıtetiniń tóraǵasy.
Buǵan deıin habarlanǵandaı, Álıhan Baımenov Termınkom músheleri qandaı shet tilderin bilýi kerektigin aıtty.
