Memlekettik organdar suraǵan qarjynyń 5 trln teńgesi negizsiz bop shyqty – vıtse-mınıstr
ASTANA. KAZINFORM — Qazaqstanda 2027 jylǵy bıýdjetti qalyptastyrý kezinde memlekettik organdar 36,9 trln teńgege ótinim jasaǵan. Nátıjesinde 30,2 trln teńge shyǵys qana qoldaý taýyp, shamamen 6,7 trln teńge bıýdjetke engizilgen joq. Bul týraly Qarjy vıtse-mınıstri Abzal Beısenbekuly aıtyp berdi.
Vıtse-mınıstrdiń sózinshe, bıýdjetti josparlaý kezinde basymdyǵy joǵary shyǵystarǵa nazar aýdarylǵan.
— Qajettilikter árqashan bıýdjet múmkindikterinen asyp túsedi. Sondyqtan da bizdiń mindetimiz — qolda bar qarajatty bólý ǵana emes, shyn máninde qajetti shyǵystar men jobalardy iriktep alý. Barlyq usynystar jan-jaqty qaralyp, olardyń ishinen eń qajettileri irikteldi, — dedi Abzal Beısenbekuly Quryltaıda ótken bıýdjet tanystyrylymynda.
2027 jylǵa memlekettik organdar bastapqyda 36,9 trln teńge málimdegen bolatyn. Tolyq pysyqtaýdan keıin 30,2 trln teńge ǵana qoldaý tapty.
— Osylaısha, shamamen 6,7 trln teńge kólemindegi shyǵystar bıýdjetke kirgen joq. Onyń ishinde 5,1 trln teńge — tipti negizsiz shyǵystar edi. Olardyń qajetti normatıvtik quqyqtyq aktileri, ádistemeleri, tarıfteri jáne rastaıtyn qujattary joq, sondaı-aq respýblıkalyq bıýdjetten qarjylandyrý qajettiligi negizdelmegen, — dedi Abzal Beısenbekuly.
Qalǵan 1,3 trln teńge — damý josparlarynyń maqsattaryna qol jetkizýge qajetti shyǵystar. Alaıda, bıýdjettiń qolda bar múmkindikterin eskere otyryp, olardy josparly kezeńde qarjylandyrý múmkin emes.
Bıýdjet shyǵystaryn ońtaılandyrýdyń taǵy bir tetigi retinde bıýdjettik sholý tásili qoldanylyp jatyr. Onyń kómegimen qoldanystaǵy shyǵystar qaıta qaralyp, únemdeý múmkindikteri anyqtalady.
Bıyl júrgizilgen bıýdjettik sholýlar nátıjesinde jańa bıýdjetti qalyptastyrý kezinde shamamen 3,1 mlrd teńge únemdeý múmkindigi anyqtalǵan.
— Bıyl bıýdjettik sholýlardyń nátıjesinde jańa bıýdjetti qalyptastyrý kezinde shamamen 3,1 mlrd teńge qarajatty únemdeldi. Atap aıtqanda, taldamalyq jáne áleýmettanýlyq zertteýlerge, sondaı-aq senimgerlik basqarýǵa berilgen aqparattyq júıelerdi júrgizýge jumsalatyn shyǵystar qaıta qaraldy. Shartsyz bazalyq shyǵystarǵa da jeke taldaý júrgizildi. Basymdyǵy tómen shyǵystardy qysqartý nátıjesinde 44,4 mlrd teńge ońtaılandyryldy, — dedi Abzal Beısenbekuly.
Buǵan deıin Qarjy vıtse-mınıstri Ulttyq qordan strategııalyq jobalarǵa 5 trln teńge bólinetinin aıtqan edi.
Sondaı-aq Qazaqstan 2027 jyly ekonomıkanyń naqty sektoryn damytýǵa 3,7 trln teńge baǵyttaýdy josparlap otyr.
