Memlekettik organdar 11,4 trıllıon teńgeniń taýary men qyzmetin satyp aldy
ASTANA. KAZINFORM - 2025 jyldyń qorytyndysy boıynsha Qazaqstannyń memlekettik organdary 11,4 trln teńgege taýarlar, jumystar men qyzmetter satyp aldy. Bul týraly Májiliste ótken qazaqstandyq qamtý úlesin arttyrý máselelerine arnalǵan otyrysta Ónerkásip jáne qurylys vıtse-mınıstri Oljas Saparbekov málimdedi.
Vıtse-mınıstrdiń aıtýynsha, ótken jyly monıtorıng sýbektileri júzege asyrǵan taýarlardyń, jumystar men qyzmetterdiń jalpy satyp alý kólemi 32,7 trln teńge boldy.
- Memlekettik organdar 2025 jyly 11,4 trln teńgege taýarlar, jumystar men qyzmetter satyp aldy. Ondaǵy ishki eldik qundylyq úlesi 25,7%-dy nemese 0,9 trln teńgeni qurady. Onyń ishinde taýarlardy satyp alý kólemi 1,5 trln teńge bolsa, ondaǵy jergilikti qamtý úlesi 34,5%-dy nemese 0,5 trln teńgeni kórsetti, - dedi Oljas Saparbekov.
Ol memlekettik satyp alý júıesinde otandyq óndirýshilerdi qoldaý úshin ulttyq rejımnen alyp tastaý sharalary qarastyrylǵanyn atap ótti. Sondaı-aq avanstyq tólemder kólemi 30% deńgeıinde belgilenip, taýarlardy jetkizý merzimderi uzartyldy jáne kelisimsharttar boıynsha tólemdi jedel júrgizý talaptary bekitildi.
Mınıstrlik ókilderi bul sharalardyń barlyǵy qazaqstandyq óndirýshilerdiń memlekettik satyp alýǵa qatysýyn keńeıtýge jáne jergilikti qamtý úlesin arttyrýǵa baǵyttalǵanyn alǵa tartty.
Aıta keteıik, buǵan deıin Májilis depýtaty Sergeı Ponomarev iri sheteldik kompanııalar qazaqstandyq qamtýdy arttyrýǵa múddeli emes ekenin aıtqan bolatyn.
