Memlekettik nómiri joǵalǵan kólikti júrgizýge bola ma — ІІM jaýap berdi
ASTANA. KAZINFORM — Memlekettik tirkeý nómiri joǵalǵan jaǵdaıda — onyń telnusqasyn alǵanǵa deıin kólik quralyn basqarýǵa bolmaıdy.
Abaı oblysy Polıtsııa departamenti memlekettik tirkeý nómiriniń joǵalýy kólik quralyn paıdalanýdy jalǵastyrýǵa quqyq bermeıtinin eske salady.
Qazaqstan Respýblıkasy Іshki ister mınıstriniń 2014 jylǵy 2 jeltoqsandaǵy № 862 buıryǵymen bekitilgen Kólik quraldarynyń jekelegen túrlerin memlekettik tirkeý jáne esepke alý qaǵıdalaryna sáıkes, kólik ıesi memlekettik tirkeý nómiriniń telnusqasyn alýǵa quqyly.
Memlekettik tirkeý nómiriniń telnusqasyn kelesi tásildermen rásimdeýge bolady:
- elektrondyq úkimet portaly arqyly elektrondyq ótinish berip, memlekettik bajdy tóleý arqyly;
- «Azamattarǵa arnalǵan úkimet» memlekettik korporatsııasy (HQKO) arqyly jeke basyn kýálandyratyn qujatty usynyp, memlekettik bajdy tóleı otyryp.
Eger memlekettik tirkeý nómiriniń bir danasy saqtalǵan bolsa, telnusqasyn alý kezinde ol tapsyrylýy tıis.
Telnusqany daıyndaý merzimi:
• Astana jáne Almaty qalalarynda — 5 jumys kúnine deıin;
• oblystar men Shymkent qalasynda — 15 jumys kúnine deıin.
Qosymsha aqy tóleý arqyly jedel daıyndaý qyzmeti de qarastyrylǵan:
• birqatar iri qalalarda — 1 jumys kúni ishinde;
• basqa óńirlerde — 5 jumys kúnine deıin.
Abaı oblysy Polıtsııa departamenti Qazaqstan Respýblıkasy Ákimshilik quqyq buzýshylyq týraly kodeksiniń 590-babynyń 2-bóligine sáıkes, memlekettik tirkeý nómiri joq kólik quralyn basqarǵany úshin 10 aılyq eseptik kórsetkish (AEK) mólsherinde aıyppul kózdelgenin eskertedi.
— Polıtsııa memlekettik tirkeý nómiri joǵalǵan jaǵdaıda onyń telnusqasyn alý úshin dereý júginýge jáne telnusqa ornatylǵanǵa deıin kólik quralyn paıdalanýdan bas tartýǵa shaqyrady. Bul ákimshilik jaýapkershilikten saqtanýǵa jáne zańnama talaptaryn saqtaýǵa múmkindik beredi, — delingen habarlamada.
Buǵan deıin elordada kóliginiń memlekettik nómirin ádeıi jasyryp qoıǵan júrgizýshi ustalǵanyn jazǵanbyz.
