Memlekettik nagradalar júıesine jańadan 9 qurmetti ataq qosyldy — Qarın

ASTANA. KAZINFORM — Respýblıka kúni qarsańynda 500-den astam eńbek adamy memlekettik nagradalarmen marapattaldy. Bul týraly Memlekettik keńesshi Erlan Qarın áleýmettik jelide jazdy. 

— Memleket basshysy Qasym-Jomart Toqaev eńbek kýltin ilgeriletý, jumysshy mamandyqtar mártebesin arttyrý saıasatyn júıeli ári josparly túrde júrgizip keledi, — dep jazdy Erlan Qarın.

— Prezıdent 2025 jyldy Jumysshy mamandyqtar jyly dep jarııalady.

— Memlekettik nagradalar júıesine jańadan 9 qurmetti ataq qosyldy: ǵalymdar men ónertapqyshtar, ınjenerler, arhıtektorlar men qurylysshylar, kenshiler men shahterler, geologtar, ónerkásip, kólik, sý jáne agrarlyq sala jumysshylary úshin.

— Elimizde 63 kásibı mereke atalyp ótiledi, Eńbek kúnine erekshe mańyz berilgen.

— Jyl saıyn elimizdiń damýyna adal eńbegimen jeke úlesin qosyp júrgen azamattarǵa memlekettik nagradalar tapsyrylady.

— Respýblıka kúni qarsańynda Prezıdent túrli salalardyń 500-den astam jumysshysyn, eńbek áýletteriniń 138 ókilin, 200-den astam ǵalymdar men pedagogterdi, medıtsına qyzmetkerlerin memlekettik nagradalarmen marapattaý týraly Jarlyqqa qol qoıdy.

— Eń joǵary memlekettik nagrada — «Qazaqstannyń Eńbek eri» ataǵy kóp jyldyq eńbek ótili bar ári eńbek áýletteriniń ókili sanalatyn mehanızator M.Qarajumanov pen shahter S. Chernobaıǵa berildi. 

Aıta ketelik búgin Prezıdent ǵylymǵa qosqan úlesi úshin memlekettik nagradalar bergen edi.