Memlekettik nagradalar qataryna Qoja Ahmet ıAsaýı ordeni engiziledi
TÚRKІSTAN. KAZINFORM — Memleket basshysy jaqyn arada memlekettik nagradalar qataryna Qoja Ahmet ıAsaýı ordenin engizý jóninde Jarlyqqa qol qoıatynyn aıtty. Bul týraly Aqordanyń baspasóz qyzmeti habarlady.
— Ata zańda Qazaqstan Respýblıkasynyń azamattary tarıhı jáne mádenı muranyń saqtalýyna qamqor bolýǵa, tarıh pen mádenıet eskertkishterine uqypty qaraýǵa mindetti dep taıǵa tańba basqandaı jazyldy. Bul tarıhı jádigeri mol Túrkistan halqy úshin mańyzdy jańashyldyq dep oılaımyn.
Biregeı bolmysy men tól mádenıetine taban tiremegen el damýdyń dańǵyl jolyna túse almaıdy.
Biz, elimizde turyp jatqan birtutas qazaq halqy, jańa Ata zańdy baǵdar etip ustap, judyryqtaı jumylyp, memlekettiligimizdi odan ári nyǵaıta berýimiz kerek, — dedi Prezıdent.
Memleket basshysy Qoja Ahmet ıAsaýıdi álemniń árbir túkpirinde, ásirese, iri memleketterde keń aýqymda dáripteýimiz qajet, biraq eń birinshiden Qazaqstannyń jurtshylyǵyna tanymal etý kerektigin aıtty.
— Osy sátti paıdalanyp, taǵy bir mańyzdy máseleni kótereıin dep otyrmyn. Men Ulttyq quryltaıdyń otyrysynyń birinde áıgili Qoja Ahmet ıAsaýı týraly aıttym.
Bul — búkil jer júzindegi adamzatqa ortaq ǵulama, ony bárimiz eń aldymen qazaq halqynyń maqtanyshy retinde qabyldaýymyz kerek.
Qoja Ahmet ıAsaýıdi álemniń árbir túkpirinde, ásirese, iri memleketterde keń aýqymda dáripteýimiz qajet, biraq eń birinshiden Qazaqstannyń jurtshylyǵyna tanymal etýimiz kerek.
Osy tarıhı tulǵaǵa joǵary sapaly týyndylardy jáne fılmderdi arnaýymyz kerek. Elimizdiń árbir oblysynda Qoja Ahmet ıAsaýıdiń biregeı zııatkerlik murasyna arnalǵan oqýlardy uıymdastyrý qajet.
Men jaqyn arada memlekettik nagradalar qataryna Qoja Ahmet ıAsaýı ordenin engizý jóninde Jarlyqqa qol qoıamyn. Bul joǵary marapat belgili otandyq jáne sheteldik ǵalymdarǵa, memleket jáne qoǵam qaıratkerlerine tapsyrylady. Bul ordenniń mártebesi joǵary bolýǵa tıis, — dedi Prezıdent.
