Memlekettik nagradalar alýǵa qatysty qoıylatyn talaptar kúsheıtiledi
ASTANA. KAZINFORM — Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine aqparatqa qol jetkizý jáne qoǵamdyq qatysý máseleleri boıynsha ózgerister men tolyqtyrýlar engizý týraly» Zańy ekinshi oqylymda qaralyp, qabyldandy.
Bul qujat 2024 jylǵy 21 aqpanda QR Parlamenti Májilisiniń jalpy otyrysynda birinshi oqylymda maquldandy.
«Atalǵan zań memlekettik apparattyń ashyqtyǵyn qamtamasyz etýde, azamattardyń aqparatqa qol jetkizý dárejesin arttyrýdaǵy júıeli qadam. Qujat aıasynda memlekettik organdardyń halyqqa qyzmet kórsetý sapasyn arttyryp, azamattarǵa memlekettiń jumysynyń ashyqtyǵyn qamtamasyz etetin tetikter paıda bolady. Bul Qazaqstannyń qoǵamdyq damý protsesindegi naqty progressıvti qadam. Zańda aqparatqa qol jetkizý quqyǵyn zańsyz shektegeni úshin memlekettik organdardyń jaýapkershiligin kúsheıtý, aqparatqa qol jetkizý salasynda memlekettik baqylaýdy engizý, aqparattyń ashyqtyǵy prezýmptsııasy men aqparatty proaktıvti túrde taratý qaǵıdattaryn bekitý, sondaı-aq múgedektigi bar adamdarǵa aqparatqa qol jetkizý úshin qajet jaǵdaılar jasaýǵa baǵyttalǵan normalar usynyldy», — dedi depýtat Erlan Saırov.
Munymen qosa, qujatty talqylaý barysynda mynadaı túzetýler engizildi:
— «Qazaqstan Respýblıkasynyń memlekettik nagradalary týraly» Zańyna memlekettik nagradalar men qurmetti ataqtar alý kezinde qoıylatyn talaptardy arttyrýǵa baǵyttalǵan normalar engizildi;
— Memlekettik tildiń rólin arttyrýǵa baǵyttalǵan tilderdi damytý salasyndaǵy memlekettik retteýdiń negizgi maqsattary, mindetteri men qaǵıdattary bekitildi.
«Zań jobasy aıasynda qaralatyn máseleler aıasynyń keńeıýin eskere otyryp, depýtattar zań jobasynyń taqyrybyn «Qazaqstan Respýblıkasynyń keıbir zańnamalyq aktilerine aqparatqa qol jetkizý, qoǵamdyq qatysý, memlekettik nagradalar jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» dep ózgertý jóninde usynys engizdi», — Erlan Saırov.
Májilis depýtattary osy zańdy qabyldap, Senatynyń qaraýyna joldady.
Buǵan deıin habarlaǵanymyzdaı, depýtat Erlan Saırov jańa zań kópshilikke shekteýsiz usynylatyn aqparattyń tizbesin keńeıtetinin atap ótti.
