Memlekettik múlikti talan-tarajǵa salǵan shymkenttik sheneýnik 8 jylǵa sottaldy

ASTANA. KAZINFORM — QMA Shymkent qalasy boıynsha departamenti asa iri kólemde bıýdjet qarajatyn jymqyrýǵa qatysty qylmystyq is boıynsha tergeý amaldaryn aıaqtady, dep habarlaıdy agenttik.

Shymkent qalasynyń Ál-Farabı aýdany ákimi apparatynyń basshysy óziniń qyzmettik laýazymyn paıdalanyp, JShS dırektorymen jáne quryltaıshysymen aldyn ala sóz baılasý arqyly bıýdjet qarajatyn jymqyrý áreketine barǵany anyqtaldy.

— Kúdiktiler qoqys jáshikteri, shaǵyn besedkalar, átkenshekter, oıyn jáne trenajer alańdaryn qosa, turǵyn úılerdiń aýlasyn abattandyrý jumystaryn júrgizý úshin, materıaldardyń qunyn kóterip smetalyq qujattar jasaǵan. Osy is-áreketterdiń saldarynan 700 mln teńgege jýyq memlekettik múlik talan-tarajǵa salynǵan. Sonymen qatar, JShS dırektory men quryltaıshysy deklaratsııalarǵa jalǵan málimetter engizý arqyly salyq tóleýden jaltarǵan. Qabyldanǵan sharalar nátıjesinde 194 mln teńgeden astam salyq bereshegi tolyq óteldi. Sot úkimimen úsh aıyptalýshy kináli dep tanylyp, 8 jylǵa bas bostandyǵynan aıyrýǵa sottaldy. Úkim zańdy kúshine engen joq, — delingen habarlamada.

QMA qoǵamdaǵy zańdylyq pen tártipti qamtamasyz etý, ekonomıkalyq jáne qarjylyq quqyq buzýshylyqtarǵa qarsy is-qımyl boıynsha belsendi jumysty jalǵastyrýda.