Memlekettik materıaldyq rezervten 80 tonna azyq-túlik, 158 tonna munaı ónimderi Atyraýǵa jiberildi
ASTANA. KAZINFORM – Sý tasqynynan zardap shekken óńirlerge temirjol, avtomobıl kólikterimen jáne áýe kemelerimen 3 290 tonna gýmanıtarlyq kómek jetkizildi. Bul týraly QR TJM Azamattyq qorǵanys jáne áskerı bólimder komıtetiniń aǵa ofıtseri Erasyl Saıpash aıtyp berdi.
«Memlekettik materıaldyq rezervten Atyraý oblysyna qosymsha 81 tonna azyq-túlik taýary men 158 tonna munaı ónimderi, Batys Qazaqstan oblysyna 10 myń adamǵa arnalǵan tósek-oryn jabdyqtary bronnan shyǵaryldy. Jalpy zardap shekken óńirlerge temirjol, avtomobıl kólikterimen jáne áýe kemelerimen 3 290 tonna gýmanıtarlyq kómek jetkizildi», - dedi E.Saıpash Respýblıkalyq aqparattyq shtabta ótken brıfıngide.
Onyń aıtýynsha, Aqmola oblysy Esil, Jabaı ózenderinde sý deńgeıiniń kóterilýine baılanysty Jarqaıyń aýdanynyń Gastello aýylynda, Jaqsy aýdanynyń Ishımskoe aýylynda, Sandyqtaý aýdanynyń Kamenka aýylynda, Soltústik Qazaqstan oblysy Qyzyljar aýdanynyń Sokolovka, Bolshaıa malyshka, Kýstovoe, Vagýlına, Krasnoıarka, Presnovka aýyldarynda 50 jeke turǵyn úı sý astynda qaldy. Onda 600-ge jýyq adam aldyn ala evakýatsııalandy.
«Sý basý qaýpine baılanysty qazirgi ýaqytta Aqtóbe oblysy Yrǵyz aýdanynyń Quılys aýylynda evakýatsııalaý júrgizilip jatyr. Elimizdiń 8 óńirinde Aqtóbe, Qostanaı, Batys Qazaqstan, Aqmola, Qaraǵandy, Atyraý, Soltústik Qazaqstan jáne Ulytaý oblystarynda jergilikti aýqymdaǵy 38 TJ rejımi bar», - dedi spıker.
