Memlekettik materıaldyq rezervte azyq-túlik pen qajetti zattar jetkilikti me
ASTANA. KAZINFORM – Búginde sý tasqynyna ushyraǵan óńirlerge memlekettik materıaldyq rezervten azyq-túlik, tósek-oryn jáne basqa da qajetti zattar jiberilip jatyr. Tolyǵyraq Memlekettik materıaldyq rezervter komıteti tóraǵasynyń orynbasary Rýslan Ormaǵambetov aıtyp berdi.
«Memlekettik materıaldyq rezervtiń nomenklatýrasyna sáıkes, qoımalarda azyq-túlik, tótenshe jaǵdaılarda qajet taýarlar, arnaıy jáne avtomobıl tehnıkalary, shatyrlar men tósek orynmen jabdyqtalǵan. Sonymen qatar rezerv qoımalarynda tirshilikke qajetti basqa da zattar bar», - dedi Rýslan Ormaǵambetov OKQ-de ótken baspasóz máslıhatynda.
Komıtet ókiliniń málimetine sáıkes, Memleket basshysynyń tapsyrmasy boıynsha tótenshe jaǵdaıdyń aldyn alý jáne joıý úshin Qostanaı, Batys Qazaqstan, Aqmola, Aqtóbe, Atyraý jáne Soltústik Qazaqstan oblysyna memlekettik materıaldyq rezervten (7 sáýirdegi jaǵdaı boıynsha) 51 arnaıy tehnıka jóneltildi. Odan bólek, sý tasqyny zardabyn tartqan 15 400 adam tósek-orynmen qamtyldy (1 mlrd 474 mln teńge).
«Sonymen qatar sý tasqynyna baılanysty tótenshe jaǵdaılar saldaryn joıý boıynsha sharalar qabyldaý úshin ShQO ákimdigine memlekettik materıaldyq rezervten qosymsha kómek berý máselesi pysyqtalýda. Memlekettik materıaldyq rezervten beriletin tehnıkalar qaýiptiń aldyn alý men joıýǵa baǵyttalady», - dep tolyqtyrdy spıker.
Sý basqan óńirlerge jiberilgen taýarlar óńirlerdegi memlekettik materıaldyq rezervter fılıaldarynda ornalastyrylyp jatyr.
Eske sala keteıik, buǵan deıin Qazgıdromet sý basqan óńirlerdegi aýa raıy boljamyn jarııalady. Sondaı-aq elimizdegi sý basqan óńirlerdiń balalary saýyqtyrý ortalyqtaryna jiberilip jatyr.
