Memlekettik kúzet qyzmetiniń qatary jas sarbazdarmen tolyqty
ASTANA. KAZINFORM — Búgin Memlekettik kúzet qyzmeti Aıryqsha maqsattaǵy kúshteriniń áskerı bólimderinde 2024 jylǵy kúzgi shaqyrylym boıynsha merzimdi áskerı qyzmet sarbazdarynyń Áskerı ant qabyldaý rásimi boldy.
«Aıbyn» prezıdenttik polki áskerı qyzmetshileriniń áskerı ant qabyldaý rásimi Astana qalasyndaǵy «Otan qorǵaýshylar» monýmenti janyndaǵy alańda, al «Batyr» prezıdenttik polki sarbazdarynyń osyndaı saltanaty rásimi Almaty qalasyndaǵy 28 gvardııashy-panfılovshylar saıabaǵynda ótti. Áskerı ant qabyldaý saltanatyna jas sarbazdardyń ata-analary men jaqyndary qatysty.
«Barlyǵymyz úshin mańyzdy oqıǵa — sarbazdardyń ant qabyldaý rásimine kýá boldyq. Jas jaýyngerler «Otanymdy qorǵaımyn» dep jaýapkershilik aldy. Bul qasıetti borysh ár azamattyń paryzy. Bıyl Halyq qaharmany Saǵadat Nurmaǵambetovtiń jáne Reıhstagqa alǵash tý tikken Raqymjan Qoshqarbaevtyń týǵanyna 100 jyl toldy. Sizder osy batyr atalarymyzdyń jolyn abyroımen jalǵaıdy dep senemin. Bizdiń qatarymyzda sizder áskerı istiń qyr-syryn úırenesizder ári úlken ómir mektebinen ótesizder. Jaýyngerlik jolda bir-birińizge serik, tirek bolyńyzdar! Antyńa adal bol, jas sarbaz!», — dedi elordada ótken rásim barysynda Memlekettik kúzet qyzmeti bastyǵynyń orynbasary — Aıryqsha maqsattaǵy kúshterdiń qolbasshysy, general-maıor Aıtqurman Omarbekov.
Memlekettik kúzeti qyzmet qataryndaǵy 2024 jylǵy kúzgi shaqyrylym boıynsha merzimdi áskerı qyzmet sarbazdary elimizdiń barlyq aımaǵy men respýblıkalyq mańyzy bar qalalarynan iriktelip alynǵan. Olar áskerı bólimderdiń dalalyq oqý ortalyqtarynda jańa shaqyrylym sarbazdaryn daıyndaý kýrsynan ótti.
Áskerı ant qabyldaý saltanaty — erekshe jaýyngerlik rásimderdiń biri. Ant qabyldaý arqyly sarbazdar ózderine Otandy qorǵaýǵa ázir bolýǵa, áskerı qyzmet mindetterin adal atqarýǵa jaýapkershilik alady.
«Otan anany qorǵaý eń asqaq paryz, abyroıly mindet ekendigin bile otyryp, búgin biz — jas sarbazdar saltanatty túrde ant qabyldadyq. Ant qabyldaý Otanyna, halqyna adal bolý, el basyna kún týsa, ony aqtyq demi qalǵansha qorǵaý, qajet bolsa janyn qııý dep bilemin. Osylaısha, biz ulanǵaıyr jerimizdi „aq bilektiń kúshimen, aq naızanyń ushymen“ qorǵaǵan jaýjúrek ata-babalarymyzdyń erlik jolyn jalǵastyrýǵa, el qorǵany bolýǵa senim arqalaǵan azamatqa aınaldyq», — dedi ant qabyldaǵan jas sarbaz Asqar Serik.
MKQ áskerı bólimderinde merzimdi qyzmet atqarý barysynda jas sarbazdar tájirıbeli nusqaýshylyq quramnyń jetekshiligimen áskerı iske úırenedi, jaýyngerlik jáne arnaıy daıarlyq sabaqtarynda áskerı mamandyqtardy meńgeredi.
Áskerı ant qabyldaǵan soń merzimdi qyzmet sarbazdary MKQ Aıryqsha maqsattaǵy kúshteri atqaratyn Qazaqstan Respýblıkasynyń Memlekettik týy men Memlekettik eltańbasy etalondaryn kúzetý, Memleket basshysynyń qatysýymen ótetin protokoldyq is-sharalarǵa qatysý, kúzetiletin tulǵalar men obektilerdiń qaýipsizdigin qamtamasyz etý sekildi mindetterdi oryndaýǵa kirisedi.
Memlekettik kúzet qyzmeti Aıryqsha maqsattaǵy kúshteriniń merzimdi áskerı qyzmet sarbazdary qataryna elimizdiń 18 ben 27 jas aralyǵyndaǵy, boıy 180 sm-den joǵary jáne 195 sm-den aspaıtyn, bilimi orta bilimnen tómen emes, densaýlyǵy jaqsy kez kelgen azamaty qosyla alady. Joǵary bilimdi, sporttyq jetistikteri men razrıadtary bar úmitkerlerge basymdyq beriledi.
Merzimdi áskerı qyzmetti QR Memlekettik kúzet qyzmeti qatarynda atqarý jas azamattar úshin myqty erlik mektebi bolady. Olar munda óziniń ómirlik jolyna qajetti mańyzdy daǵdylarǵa úırenedi. Jastar úshin bul kezeń ary qaraıǵy mansap jolyn jalǵastyrýǵa negiz, áleýmettik lıft bolýy múmkin. Merzimdi áskerı qyzmetti aıaqtaǵandar qalaýy boıynsha qyzmetti kelisimshart negizinde jalǵastyra alady. Odan ári olardyń arnaýly memlekettik organnyń qyzmetkeri jáne ofıtseri bolyp, kúzetiletin tulǵalar men obektilerdiń qaýipsizdigin qamtamasyz etý boıynsha mindetterdi atqarý múmkindigi bar.
Sonymen qatar MKQ merzimdi qyzmet sarbazdary úshin merzimdi áskerı qyzmet atqarǵan azamattardy áleýmettik qoldaý boıynsha Qazaqstan Respýblıkasynda belgilengen barlyq jeńildikter qoldanylady.
