Memlekettik kúzet qyzmetine sarbazdar qalaı irikteledi

ASTANA. KAZINFORM — 21 qarashada Qazaqstan Respýblıkasy Memlekettik kúzet qyzmetiniń Aıryqsha maqsattaǵy kúshteriniń áskerı bólimderinde kúzgi shaqyrylym sarbazdary Áskerı ant qabyldady. Saltanatty rásim Astana men Almaty qalalarynda ótti.

Memlekettik kúzet qyzmetine sarbazdar qalaı irikteledi
Foto: Memlekettik kúzet qyzmeti

«Aıbyn» prezıdenttik polkiniń áskerı qyzmetshileri Áskerı antty Astanadaǵy «Qazaq eli» alańynda, Táýelsizdik saraıynyń aldynda qabyldady. Al «Batyr» prezıdenttik polkiniń sarbazdary úshin saltanatty rásim Almatydaǵy 28 gvardııashy-panfılovshylar saıabaǵynda ótti. Sharaǵa jas sarbazdardyń ata-analary men jaqyndary qatysty.

QR Memlekettik kúzet qyzmetiniń 2026 jylǵy kúzgi shaqyrylym sarbazdary elimizdiń barlyq óńiri men respýblıkalyq mańyzy bar qalalarynan iriktelgen. Olar áskerı bólimderdiń dalalyq oqý ortalyqtarynda jańa shaqyrylym sarbazdaryn daıarlaý kýrsynan ótti.

Memlekettik kúzet qyzmetine sarbazdar qalaı irikteledi
Foto: Memlekettik kúzet qyzmeti

Áskerı ant qabyldaý — erekshe jaýyngerlik rásimderdiń biri. Ant berý arqyly sarbazdar Otandy qorǵaýǵa ázir bolýǵa jáne áskerı qyzmet mindetterin adal atqarýǵa jaýapkershilik alady.

QR MKQ áskerı bólimderinde merzimdi qyzmet atqarý kezinde jas sarbazdar tájirıbeli nusqaýshylardyń jetekshiligimen áskerı iske úırenip, jaýyngerlik jáne arnaıy daıarlyq sabaqtarynda áskerı mamandyqtardy meńgeredi.

Áskerı ant qabyldaǵannan keıin merzimdi qyzmet sarbazdary QR Memlekettik kúzet qyzmetiniń mindetterin atqarýǵa kirisedi. Olardyń qatarynda Qazaqstan Respýblıkasynyń Memlekettik Týy men Memlekettik Eltańbasy etalondaryn kúzetý, Memleket basshysynyń qatysýymen ótetin protokoldyq is-sharalarǵa qatysý, kúzetiletin tulǵalar men obektilerdiń qaýipsizdigin qamtamasyz etý bar.

QR Memlekettik kúzet qyzmetiniń merzimdi áskerı qyzmetine 18 ben 27 jas aralyǵyndaǵy, boıy 180 santımetrden joǵary jáne 195 santımetrden aspaıtyn, orta jáne odan joǵary bilimi bar, densaýlyǵy jaqsy azamattar qabyldana alady. Joǵary bilimi, sporttyq jetistikteri men razrıadtary bar úmitkerlerge basymdyq beriledi.

Memlekettik kúzet qyzmeti
Foto: Memlekettik kúzet qyzmeti

Memlekettik kúzet qyzmetinde merzimdi áskerı boryshyn óteý jas azamattar úshin myqty erlik mektebi sanalady. Munda olar ómirlik jolyna qajetti mańyzdy daǵdylardy meńgeredi. Bul kezeń jastardyń bolashaq mansabyna jol ashatyn áleýmettik lıft bolýy múmkin.

Merzimdi áskerı qyzmetti aıaqtaǵandar qalaýy boıynsha kelisimshart negizinde qyzmetin jalǵastyra alady. Keıin arnaýly memlekettik organnyń qyzmetkeri jáne ofıtseri atanyp, kúzetiletin tulǵalar men obektilerdiń qaýipsizdigin qamtamasyz etý mindetterin atqarýǵa múmkindik bar.

Sonymen qatar QR MKQ merzimdi qyzmet sarbazdaryna Qazaqstanda merzimdi áskerı qyzmet ótkergen azamattarǵa arnalǵan barlyq áleýmettik qoldaý sharalary, sonyń ishinde «Srochnıkı 2.0» baǵdarlamasyna qatysý múmkindigi beriledi.

Eske salaıyq, buǵan deıin Oraldaǵy 5517 áskerı bóliminde 200-den astam jas sarbaz áskerı ant qabyldap, Ulttyq ulan qataryna qosylǵanyn habarlaǵan edik.