Memlekettik kúzet qyzmetine ákimshilik hattamalar toltyrý ókilettigi berilmek
ASTANA. KAZINFORM — Búgin Parlament Májilisiniń jalpy otyrysynda Memlekettik kúzet qyzmetine usynylǵan jańa ókilettik boıynsha túsinik berildi.
Aıta keteıik, búgin Májilis depýtattary «Keıbir zańnamalyq aktilerge Qazaqstannyń arnaýly memlekettik organdarynyń qyzmeti máseleleri boıynsha ózgerister men tolyqtyrýlar engizý týraly» zań jobasy men ilespe qujatty birinshi oqylymda maquldady.
Qujat aıasynda Memlekettik kúzet qyzmetiniń jumysyn jedeldetý maqsatynda atalǵan mekemege qyzmeti barysynda oryndalmaǵan nusqamalarǵa ákimshilik quqyq buzýshylyq týraly hattama jasaý quqyǵyn berý eskerilgen.
Osy oraıda QR Memlekettik kúzet qyzmeti bastyǵynyń orynbasary Shyńǵys Jaqypov vedomstvo qyzmetkerleri naqty qaı jaǵdaıda hattama toltyrýǵa quzyretti bolatynyn túsindirdi.
- «Memlekettik kúzet qyzmeti týraly» Zańda qyzmettiń kúzetiletin adamdardyń ómiri men densaýlyǵyna qaýip tóndiretin quqyq buzýshylyqtardy, yqpal etetin mán-jaılardy joıý jóninde nusqama engizý ókilettigi kózdelgen. Atap aıtqanda, bul - pılotsyz apparattardy paıdalaný qaǵıdalaryn buzý, kúzetiletin obektilerdiń mańynda ruqsatsyz jumystardy júrgizý jáne basqa da qaýipti faktiler. Bul norma – materıaldyq quqyq normasy. Sonymen qatar, nusqamany oryndamaǵan úshin sot arqyly jaýapkershilikke tartý múmkindigi bar. Alaıda osy quqyq buzýshylyqtar boıynsha ákimshilik hattama toltyrýǵa arnalǵan naqty protsestik norma qazirgi kezde zańnamada qarastyrylmaǵan. Osynyń saldarynan quqyq buzatyndardy is júzinde jaýapkershilikke tartý tetigi tolyq júzege aspaı otyr. Usynylyp otyrǵan túzetýler osy quqyqtyq olqylyqtardy joıýǵa baǵyttalǵan. Sondyqtan Memlekettik kúzet qyzmetine ákimshilik hattamalar toltyrý ókilettigin berý kózdeledi. Bul - kúzetiletin adamdar men nysandardyń qaýipsizdigin qamtamasyz etý tıimdiligin arttyrýǵa baǵyttalǵan qajet qadam, - dedi Sh. Jaqypov.
Onyń sózine qaraǵanda, atalǵan ókilettik tek qyzmet quzyreti aıasynda iske asyrylady jáne Memlekettik kúzet qyzmetiniń mindetterin oryndaýǵa tikeleı kedergi keltiretin árketterge ǵana qatysty qoldanylady.
- Bizdiń negizgi masatymyz - aıyppul salý emes, kerisinshe, memlekettik qaýipsizdikke tónetin qaterlerdiń aldyn alý jáne der kezinde joıý. Osy baǵyttaǵy barlyq is-áreket ákimshilik quqyq buzýshylyq týraly zańnama talaptaryna qatań sáıkes júzege asyrylady, - dedi Memlekettik kúzet qyzmeti bastyǵynyń orynbasary.
