Memlekettik kúzet qyzmetin jetildirýge baǵyttalǵan túzetýler maquldandy - Senat
ASTANA. KAZINFORM — Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine QR arnaýly memlekettik organdarynyń qyzmeti máseleleri boıynsha ózgerister men tolyqtyrýlar engizý týraly» Zańy men ilespe qujat eki oqylymda qaralyp, maquldandy.
- Qazirgi kezeńde qaýipsizdik salasyndaǵy qaterlerdiń sıpaty aıtarlyqtaı ózgerip jatyr. Terrorızm men ekstremızm, kıberqaýipter, transulttyq qylmys sekildi jańa syn-qaterler memleketten naqty ári ýaqytyly quqyqtyq sheshimderdi talap etedi. Osyǵan baılanysty zańdar qoldanystaǵy quqyqtyq tetikterdi jetildirýge, quqyq qoldaný tájirıbesindegi olqylyqtardy joıýǵa jáne memlekettik organdar qyzmetiniń úılesimdiligin qamtamasyz etýge arnalǵan. Zańda terrorızm men ekstremızmge qarsy is-qımyl salasyndaǵy quqyqtyq normalardy kúsheıtýge erekshe nazar aýdarylǵan, - dedi senator Amangeldi Nuǵmanov.
Atap aıtqanda, Ákimshilik quqyq buzýshylyq týraly kodekstiń 453-baby ákimshilik jaýapkershilikti naqty bekitýge múmkindik beredi. Osy arqyly qoldanystaǵy zańnamadaǵy quqyqtyq olqylyq joıylyp, terrorızm men ekstremızmge qarsy is-qımyl tetikteri kúsheıtiledi.
Sonymen qatar ekstremıstik materıaldardyń áreketterin quqyqtyq retteý aıasyna qosymsha engizý kózdelip otyr. Bul qazirgi aqparattyq keńistiktegi qaýipterdiń ózgerýine baılanysty qabyldanyp otyrǵan mańyzdy sharalardyń biri.
- Memlekettik kúzet qyzmetin jetildirýge baǵyttalǵan túzetýler de mańyzdy oryn alady. Zań arqyly Memlekettik kúzet qyzmetiniń quqyqtary men mindetteri qazirgi zamanǵy qaýipsizdik talaptaryna sáıkestendiriledi. Kúzet is-sharalaryn ótkizý barysynda azamattardy, olardyń zattaryn jáne kólik quraldaryn tekserý tártibi naqty reglamentteledi. Sonymen qatar kúzetiletin obektilerge tyıym salynǵan zattardy alyp ótýge shekteýler engizilip, qaýipsizdik rejımi kúsheıtiledi. Sonymen birge Memlekettik kúzet qyzmetkerleriniń dene kúshin, arnaıy quraldardy, qarý-jaraqty, jaýyngerlik tehnıkany jáne qyzmettik janýarlardy qoldaný tártibi júıelenedi. Mundaǵy negizgi maqsat – kúsh qoldanýdyń quqyqtyq shekterin naqty belgileý, azamattardyń qaýipsizdigin qamtamasyz etý jáne qyzmetkerlerdiń jaýapkershiligin aıqyndaý, - dedi depýtat.
Budan basqa, Memlekettik kúzet qyzmetiniń laýazymdy adamdaryna óz quzyreti sheginde bergen zańdy talaptardy nemese nusqamalardy oryndamaǵan jaǵdaıda ákimshilik quqyq buzýshylyq týraly hattama jasaý quqyǵyn berý usynyldy.
Zańdarda memlekettik múlikti paıdalaný máseleleri de qarastyrylǵan. Azamattyq kodekske engiziletin túzetýler arqyly memlekettik mekemelerge bekitilgen múlikti paıdalaný tártibi qoldanystaǵy zańnamamen tolyq sáıkestendiriledi. Bul memlekettik múliktiń saqtalýyn qamtamasyz etýge, ony maqsatsyz paıdalanýdyń aldyn alýǵa jáne quqyq qoldaný tájirıbesindegi túsinbeýshilikterdi joıýǵa múmkindik beredi. Sondaı-aq, áskerı jáne arnaýly oqý oryndarynda daıarlanǵan mamandarǵa jumsalǵan memleket qarajatyn óteý tetigi jetildiriledi.
- Memleket qaýipsizdik salasyndaǵy bilikti kadrlardy daıarlaýǵa qomaqty qarjy bóledi. Osyǵan baılanysty memleket shyǵyndaryn óteýge mindetti tulǵalardyń aýqymy keńeıtiledi. Endi bul talap tek kýrsanttar men tyńdaýshylarǵa ǵana emes, magıstranttarǵa, doktoranttarǵa, sondaı-aq halyqaralyq sharttar negizinde sheteldik oqý oryndarynda bilim alǵan azamattarǵa da qoldanylady. Bul norma, eń aldymen, memlekettik qarajatqa degen jaýapkershilikti kúsheıtýge baǵyttalǵan. Tutastaı alǵanda, usynylyp otyrǵan zańdar ulttyq qaýipsizdik júıesin odan ári nyǵaıtýǵa, arnaýly memlekettik organdar qyzmetiniń tıimdiligin arttyrýǵa, ekstremızm men terrorızmge qarsy is-qımyl tetikterin jetildirýge, ákimshilik zańnamany jańǵyrtýǵa jáne quqyqtyq normalardyń ózara úılesimdiligin qamtamasyz etýge baǵyttalǵan, - dedi Amangeldi Nuǵmanov.
Ákimshilik quqyq buzýshylyq týraly kodekske engizilgen ózgerister
Іlespe zańnyń maqsaty - memlekettik qupııalardy qorǵaý salasyndaǵy quqyq buzýshylyqtardyń aldyn alý jáne jolyn kesý, sondaı-aq QR Ákimshilik quqyq buzýshylyq týraly kodeksiniń jáne beıindik zańdardyń normalaryn úılestirý.
Zańnyń negizgi mindeti:
- memlekettik qupııalardy qorǵaý salasyndaǵy zańnamada belgilengen talaptardy qaıta buzǵany úshin jaýaptylyq sharalaryn kúsheıtýge;
- kúzet is-sharalaryn ótkizý aımaqtarynda qaterlerdiń jolyn kesýdiń jedeldigin arttyrýǵa;
- «Terrorızmge qarsy is-qımyl týraly» jáne «Ekstremızmge qarsy is-qımyl týraly» Qazaqstan Respýblıkasy Kodeksi men Zańdarynyń normalary arasyndaǵy qaıshylyqtardy joıýǵa;
- ákimshilik júktemeni azaıtýǵa, atap aıtqanda salyq tóleýshilerge buryn salynǵan ákimshilik aıyppuldar men jazalardy oryndaýdy toqtatýǵa baǵyttalǵan sharalardy zańnamalyq qamtamasyz etý.
Kútiletin nátıje: memlekettik qupııalardy qorǵaý salasyndaǵy teris qylyqtardy júıeli túrde jasaǵany úshin jaýaptylyqty arttyrýdy, sondaı-aq quqyqtyq olqylyqtardyń ornyn toltyrýdy jáne zańnamanyń kelisilýin qamtamasyz etýdi kózdeıtin derbes ákimshilik quramdardy engizý.
Buǵan deıin Memlekettik kúzet qyzmetine ákimshilik hattamalar toltyrý ókilettigi berilýi múmkin ekenin jazǵan edik.
