Memlekettik kúzet qyzmeti qataryndaǵy merzimdi áskerı qyzmetke úmitkerler irikteledi
ASTANA.KAZINFORM - 2 naýryzda barlyq aımaqtardaǵy jergilikti áskerı atqarý organdarynda QR Memlekettik kúzet qyzmeti qataryndaǵy merzimdi áskerı qyzmetke úmitkerler irikteledi.
«QR Memlekettik kúzet qyzmeti» memlekettik mekemesi Instagram paraqshasynda irikteýdiń 10 sáýirge deıin júretinin habarlady.
QR Memlekettik kúzet qyzmeti sarbazdary qataryna elimizdiń 18 ben 27 jas aralyǵyndaǵy, boıy 180 sm-den joǵary jáne 195 sm-den aspaıtyn, bilimi orta, orta arnaýly jáne joǵary, densaýlyǵy jaqsy kez kelgen azamaty qosyla alady. Joǵary bilimdi, sporttyq jetistikteri men razrıadtary bar úmitkerlerge basymdyq beriledi.
Іrikteýden ótken sarbazdar áskerı boryshyn Astana jáne Almaty qalalaryndaǵy «Aıbyn» jáne «Batyr» prezıdenttik polkterinde atqarady.
Olar tájirıbeli nusqaýshylyq quramnyń jetekshiligimen áskerı iske úırenedi, jaýyngerlik jáne arnaıy daıarlyq sabaqtarynda áskerı mamandyqtardy meńgeredi.
QR MKQ merzimdi qyzmet sarbazdary Qazaqstan Respýblıkasynyń Memlekettik Týy men Memlekettik Eltańbasy etalondaryn kúzetý, Memleket basshysynyń qatysýymen ótetin protokoldyq is-sharalarǵa qatysý, kúzetiletin tulǵalar men obektilerdiń qaýipsizdigin qamtamasyz etý sekildi mindetterdi atqarady.
- Merzimdi áskerı qyzmetti QR Memlekettik kúzet qyzmeti qatarynda atqarý jas azamattar úshin myqty erlik mektebi bolady, olar munda óziniń ómirlik jolyna qajetti mańyzdy daǵdylarǵa úırenedi. Jastar úshin bul kezeń ary qaraıǵy mansap jolyn jalǵastyrýǵa negiz, áleýmettik lıft bolýy múmkin, - delingen habarlamada.
Sondaı-aq onda merzimdi áskerı qyzmetti aıaqtaǵandar qalaýy boıynsha qyzmetti kelisimshart negizinde jalǵastyra alatyny, odan ári olardyń arnaýly memlekettik organnyń qyzmetkeri jáne ofıtseri bolyp, kúzetiletin tulǵalar men obektilerdiń qaýipsizdigin qamtamasyz etý boıynsha mindetterdi atqarý múmkindigi bar ekeni aıtylǵan.
Sonymen qatar QR MKQ merzimdi qyzmet sarbazdary úshin merzimdi áskerı qyzmet atqarǵan azamattardy áleýmettik qoldaý boıynsha Qazaqstan Respýblıkasynda belgilengen barlyq jeńildikter qoldanylady.
Osyǵan deıin elordada Ulttyq ulannyń bastamasymen «Cyber sarbaz» synyby ashylǵany týraly jazdyq.