Memlekettik kúzet qyzmeti Astananyń birneshe kóshesinde qozǵalysty shekteıdi

ASTANA. KAZINFORM – Elordanyń birqatar kóshesinde kólik pen jaıaý júrginshilerdiń qozǵalysyna ýaqytsha shekteý engiziledi.

«Astanada qoǵamdyq-saıası is-sharalardy ótkizýge baılanysty 7-10 tamyz aralyǵynda Elordanyń Esil aýdanynda (Ońtústik aınalma jol, Qabanbaı batyr dańǵyly, Máńgilik El, Uly Dala, Dostyq, Kereı, Jánibek handar kósheleri), Nura aýdanynda (Turan, Uly Dala dańǵyly) jáne Almaty aýdanynda (Táýelsizdik dańǵyly, Nájimedenov, Amanjolov kóshesi) birqatar kóshedegi kólik pen jaıaý júrginshilerdiń qozǵalysyna ýaqytsha shekteýler engiziledi», - dep jazylǵan Memlekettik kúzet qyzmetiniń habarlamasynda.

Daıyndyq aıasynda 3 tamyz kúni birlesken josparly oqý-jattyǵýlar ótkiziledi.

«Іs-sharalar arnaýly memlekettik jáne quqyq qorǵaý organdarynyń, sondaı-aq Qarýly Kúshterdiń, onyń ishinde áskerı avıatsııanyń resýrstaryn paıdalanýdy kózdeıdi. Osyǵan baılanysty elorda turǵyndary men qonaqtarynan qaýipsizdikti qamtamasyz etý boıynsha júrgizilip jatqan is-sharalarǵa túsinistikpen qaraýdy suraımyz», - deıdi Memlekettik kúzet qyzmeti.

Aıta keteıik, 2-3 tamyz kúnderi Kongo Respýblıkasynyń Prezıdenti Denı Sassý-Ngesso Qazaqstanǵa resmı saparmen keledi.

7-8 tamyz kúnderi Ózbekstan Respýblıkasynyń Prezıdenti Shavkat Mırzıeevtiń elimizge memlekettik sapary bolady.

9 tamyz kúni Astanada Ortalyq Azııa memleketteri basshylarynyń altynshy konsýltatıvtik kezdesýi ótedi.