Memlekettik kirister organdarynda bıometrııalyq sáıkestendirýdi paıdalaný qaǵıdalary bekitildi
ASTANA. KAZINFORM – Qarjy mınıstri 2025 jylǵy 3 qazanda memlekettik kirister organdarynyń aqparattyq júıesine bıometrııalyq sáıkestendirý quralyn paıdalaný qaǵıdalaryn bekitetin buıryqqa qol qoıdy.
Qujatqa sáıkes, bıometrııalyq sáıkestendirý kelesi jaǵdaılarda qoldanylady:
- salyq tóleýshini elektrondyq shot-faktýra aqparattyq júıesine qatysýshy retinde tirkeý kezinde;
- salyq tóleýshige qatysty táýekeldi basqarý júıesi arqyly baǵalaý kezinde.
Bıometrııalyq sáıkestendirý elektrondyq shot-faktýrany rásimdeý kezinde táýligine bir ret júrgiziledi. Eger sáıkestendirý sátsiz ótse, elektrondyq shot-faktýrany rásimdeý múmkin emes. Mindetti bıometrııalyq tekserý barlyǵy úsh ret oryndalýy tıis.
Salyq tóleýshi qajetti mólsherde bıometrııalyq sáıkestendirýden ótkennen keıin, elektrondyq shot-faktýra aqparattyq júıesi oǵan elektrondyq shot-faktýrany qaıtalap tekserýsiz rásimdeýge múmkindik beredi.
Sondaı-aq elektrondyq shot-faktýra aqparattyq júıesi basshynyń nemese ýákiletti tulǵanyń elektrondyq tsıfrlyq qoltańba (ETsQ) derekteri zańdy tulǵa, jeke kásipker nemese jeke tulǵa týraly málimetterdiń sáıkestigin tekseredi. Atalǵan derekter elektrondyq shot-faktýra aqparattyq júıesi operatorynyń normatıvtik-anyqtamalyq bazasynda jáne Jasandy ıntellekt jáne tsıfrlyq damý mınıstrliginiń «Tsıfrlyq profıl» platformasynda saqtalady.
Derekter sáıkes kelgen jaǵdaıda, elektrondyq shot-faktýra aqparattyq júıesiniń operatory:
- salyq tóleýshini tirkeý kezinde oǵan elektrondyq shot-faktýra aqparattyq júıesiniń qatysýshysy mártebesin beredi;
- táýekel anyqtalǵan jaǵdaıda aqparatty óńdep, elektrondyq shot-faktýraǵa tirkeý nómirin taǵaıyndaıdy.
Buıryq 2025 jylǵy 18 qazanda kúshine enedi jáne 2025 jylǵy 31 jeltoqsanǵa deıin qoldanysta bolady.
Eske sala ketsek, salyq organdarynda bıometrııalyq sáıkestendirý engiziletini týraly osy jazda habarlaǵan edik.
Bıyl mamyrda elimizdiń mamandandyrylǵan halyqqa qyzmet kórsetý ortalyqtarynda bıometrııalyq sáıkestendirý engizildi.