Memlekettik kirister komıtetiniń Derekterdi óńdeý ortalyǵy qurylady
ASTANA. KAZINFORM — Kelesi jyly Memlekettik kirister komıtetiniń Derekterdi óńdeý ortalyǵy qurylady. Bul týraly Úkimet otyrysynda aıtydy.
Úkimet basshysy Prezıdenttiń bıyl jalpy ishki ónimdegi kóleńkeli ekonomıka úlesin 15%-ǵa deıin azaıtý mindetin qoıǵanyn eske saldy. Sondaı-aq, Joldaýda jappaı tsıfrlandyrý jáne jasandy ıntellekt tehnologııasyn engizý arqyly ekonomıkanyń barlyq salasyn jańǵyrtý qajettigin atap ótti.
– Bul strategııalyq mindet. Birqatar sektorda, onyń ishinde saýda, qurylys jáne aýyl sharýashylyǵy salalarynda tsıfrlandyrý deńgeıi áli de jetkiliksiz. Barlyq múddeli mınıstrlikter óz salasynda jappaı tsıfrlandyrýdy qamtamasyz etýi qajet. Ekonomıkany tsıfrlyq jańǵyrtý sheńberinde Memlekettik kirister komıteti memorgandar arasynda kósh bastaýǵa tıis. Sonymen qatar tsıfrlyq bastamalardy iske asyrý úshin tıisti resýrstar qajet. Osyǵan baılanysty Jasandy ıntellekt jáne tsıfrlyq damý mınıstrligi kelesi jyly Memlekettik kirister komıtetiniń óz aldyna Derekterdi óńdeý ortalyǵyn qurýy kerek, - dedi Premer-mınıstr Oljas Bektenov Úkimet otyrysynda.
Sonymen birge, Premer birqatar tsıfrlyq jobalar óz tıimdiligin kórsetkenin atap ótti.
– Kóleńkeli ekonomıkamen kúreste qolma-qol aqshasyz tólemder mańyzdy ról atqarady. Keıbir óńirlerde avtomobıl joldary jáne temirjol qurylysy, iri qara mal men aýyl sharýashylyǵy tehnıkasyn satyp alýdy sýbsıdııalaý, sondaı-aq qosylǵan qun salyǵyn qaıtarý kezinde tsıfrlyq teńgeni qoldaný boıynsha pılottyq jobalar iske asyrylýda. Qarjy mınıstrligi Ulttyq Bankpen birlesip, respýblıkalyq jáne jergilikti bıýdjetterdiń, memlekettik holdıngterdiń bıýdjetteri sheńberinde tsıfrlyq teńgeni paıdalanýdy qamtamasyz etýi qajet, - dedi Úkimet basshysy.
Oljas Bektenov Qarjy mınıstrligi Qarjylyq monıtorıng agenttigimen birlesip, kóleńkeli ekonomıkaǵa qarsy is-qımyldy úılestirý jumysyn kúsheıtýi qajettigin tapsyrdy.
– Zańdy tulǵalardy tirkeý men qaıta tirkeýdi qadaǵalap otyrý úshin Ádilet, Qarjy, Jasandy ıntellekt mınıstrlikterine Qarjylyq monıtorıng agenttigimen birlesip, 25 qarashaǵa deıin táýekelderdi basqarýdyń avtomattandyrylǵan júıesin engizý jumystaryn aıaqtaýdy tapsyramyn, - dedi Premer-Mınıstr.
Buǵan deıin Qarjy mınıstri Mádı Tákıev salyqtan jaltarǵan kásipkerler týraly aıtqan edi.