Memlekettik kirister komıteti ózin-ózi jumyspen qamtyǵan 500 myń adamdy «kóleńkeden» shyǵarmaq
ASTANA. KAZINFORM — Memlekettik kirister komıteti osy jyldyń sońyna deıin ózin-ózi jumyspen qamtyǵan 500 myń adamdy «kóleńkeden» shyǵarýdy josparlap otyr. Bul týraly Memlekettik kirister komıtetiniń tóraǵasy Jandos Dúısembıev málim etti.
Onyń paıymynsha, ózin-ózi jumyspen qamtyǵandardyń sany budan da kóp bolýy múmkin.
— Úkimettiń málimetinshe, búgingi kúni 300 myńnan astam jeke tulǵa ózin-ózi jumyspen qamtý rejımi aıasynda zańdastyrylǵan. Alaıda, biz bul kórsetkish tolyq shynaıy emes ekenin bilemiz, ıaǵnı áleýet bar. Bıyl biz 500 myńǵa deıin ózin-ózi jumyspen qamtyǵan azamatty tirkeýdi qamtamasyz etemiz. Osy baǵytta jumys istep jatyrmyz, — dedi komıtet basshysy.
Tóraǵanyń aıtýynsha, 2026 jyldyń alǵashqy eki aıynda bıýdjet 117 paıyzǵa oryndaldy. Sonymen qatar, respýblıkalyq bıýdjetke túsetin salyq túsimderi 2025 jylmen salystyrǵanda 29 paıyzǵa artty. Degenmen, keıbir ekonomıkalyq qyzmet túri áli de kóleńkede qalyp otyr.
— Naryqtyń bir bóligi kóleńkede bolǵan kezde, júkteme adal bızneske túsedi. Bul ádiletsiz, biz muny túsinemiz. Kóleńkeli ekonomıkanyń úlesi 2019 jylǵy 23 paıyzdan 2024 jyly 16, paıyzǵa deıin tómendedi. Aldymyzǵa qoıylǵan maqsatty kórsetkishter — 2026 jyly 14,5 paıyz jáne 2028 jyly 13,8 paıyz, — dedi ol.
Buǵan deıin elimizde salalyq qoldaý sharalaryn usyný barysynda týyndaıtyn fıskaldyq táýekelder úshin mınıstrlikter men memlekettik organdardyń jaýapkershiligin bekitý josparlanyp otyrǵanyn jazǵan edik.
