Memlekettik kirister komıteti: Múlik salyǵyn tóleýdiń sońǵy merzimi – 1 qazan
ASTANA.KAZINFORM – Qazaqstan Qarjy mınıstrligi Memlekettik kirister komıteti jeke tulǵalarǵa 2024 jylǵa arnalǵan múlik salyǵyn tóleýdiń sońǵy merzimi – osy jyldyń 1 qazany ekenin eskertedi.
Komıtettiń málimetinshe, jeke tulǵalardyń múlik salyǵy «Azamattarǵa arnalǵan úkimet» memlekettik korporatsııasy aıqyndaıtyn salyq salý obektileriniń quny men menshik quqyǵy ıelengen naqty merzimge baılanysty esepteledi.
Salyq somasy kórsetilgen habarlamalar salyq zańnamasyna sáıkes shilde aıynda menshik ıelerine joldanǵan. Ekinshi deńgeıdegi bankterdiń mobıldi qosymshalaryn paıdalanýshylarǵa PUSH-habarlamalar arqyly aqparat jetkizildi.
Sonymen qatar habarlamada tólem jasalmaǵan jaǵdaıda qandaı sharalar qoldanylatyny kórsetilgen.
– Memlekettik kirister komıteti 2025 jyldyń 2 qazanynan bastap múlik salyǵyn ýaqytyly tólemegen azamattarǵa ósimpul esepteletinin eskertedi. Oǵan qosa salyq bereshegi týraly habarlamalar jiberiletin bolady, – delingen qujatta.
2025 jyldyń 14 qarashasynan bastap bereshek somasy 1 AEK-ten (aılyq eseptik kórsetkish) asqan jaǵdaıda, jeke tulǵalarǵa salyqtyq buıryqtar joldanyp, 5 jumys kúni ishinde tólenbese, olar májbúrlep óndirip alý úshin jeke sot oryndaýshylarynyń qaraýyna beriledi.
«Atqarýshylyq is júrgizý jáne sot oryndaýshylarynyń mártebesi týraly» Zańǵa sáıkes, jeke sot oryndaýshylary boryshkerlerdiń bank shottaryna jáne múlkine tyıym salý, múlikti satý, sondaı-aq shetelge shyǵýǵa shekteý qoıý syndy sharalardy qoldanýǵa quqyly.
Bereshek somasy 40 AEK-ten asqan jaǵdaıda, azamattyń Qazaqstan Respýblıkasynan shyǵýyna tyıym salynýy múmkin. Bul shekteý týraly aqparatty Adilet Gov portalynan bilýge bolady.
Sonymen qatar 2024 jylǵy 19 tamyzdan bastap salyqtyq mindettemelerdi májbúrlep oryndatýdyń jeńildetilgen tártibi kúshine endi. Ol 20 AEK-ten kem bereshek bolǵan jaǵdaıda qoldanylady. Mundaı kezde salyqty óndirý naqty sot oryndaýshyǵa berilmeı, bank shottaryna avtomatty túrde tyıym salynady jáne múlikke qatysty operatsııalar shekteledi.
Aıta ketý kerek, jeńildetilgen tártippen májbúrlep oryndatý kezinde jeke sot oryndaýshysynyń qyzmetin tóleý nemese óndirip alynǵan soma esebinen syıaqy ustaý (25%-ǵa deıin) qarastyrylmaǵan.
Jeke tulǵalar ózderiniń salyq bereshegi týraly málimetti:
• e-Salyq Azamat mobıldi qosymshasy arqyly (Elektrondyq servıster → Salyqtar men áleýmettik tólemder boıynsha bereshek servısi → JSN engizý),
• Ekinshi deńgeıdegi bankterdiń mobıldi qosymshalary arqyly teksere alady.
Memlekettik kirister komıteti azamattardy salyqtyq buıryq jeke sot oryndaýshylarǵa jiberilgenge deıin múlik salyǵyn ýaqytyly tóleýge shaqyrady.
Eske sala keteıik, Memlekettik kirister komıteti salyq tóleýshilerge mańyzdy habarlama jasaǵan edi.