Memlekettik kirister komıteti birneshe aqparattyq júıeni iske qosty
ASTANA. KAZINFORM — Qarjy mınıstrliginiń Memlekettik kirister komıteti birneshe aqparattyq júıeni iske qosty. Bul týraly atalǵan komıtet tóraǵasynyń orynbasary Ánýar Súleımenov aıtty.
Onyń aıtýynsha, Salyqtyq ákimshilendirýdiń ıntegratsııalanǵan júıesin, Smart Data Finance jáne Astana-1 keden júıesin iske qosýdaǵy maqsaty — salyqtyq jáne kedendik ákimshilendirýdiń ashyqtyǵyn, yńǵaılylyǵy men tıimdiligin arttyrý, sondaı-aq bıznes pen azamattar úshin ákimshilik júktemeni azaıtý. Olardyń ishindegi mańyzdylarynyń biri salyqtardy avtomattandyrylǵan esepteýge arnalǵan úlken málimetter bazasy — Smart Data Finance.
SDF-te 1,9 mln jeke kásipker, 584 myń zańdy tulǵa jáne 20,4 mln jeke tulǵa týraly málimetter bar. Munda salyq tóleýshiniń sandyq profıli qalyptasady: múlik, jumys orny, salyq tóleý, AÁK alýshynyń mártebesi týraly aqparat. Zańdy tulǵalarda qosymsha eńbekaqy tóleý qory, qyzmetkerler sany, salyq eseptiliginiń jáne elektrondyq shot-faktýralardyń tarıhy tirkeledi.
— Salyqtyq ákimshilendirýdiń ıntegratsııalanǵan júıesi eskirgen 7 sheshimdi biryńǵaı platformaǵa biriktirip, kásipkerlerdi tirkeýden bastap kompanııa jabylǵanǵa deıin tolyq salyqtyq qoldaýdy, sonyń ishinde derbes shottardy júrgizýdi, eseptilikti qabyldaýdy, salyq organdarynyń baqylaý sharalaryn jáne memlekettik qyzmetterdi qamtamasyz etti. Atap aıtqanda, Salyqtyq ákimshilendirýdiń ıntegratsııalanǵan júıesi 13 mln paıdalanýshy úshin júıeniń qoljetimdiliginiń joǵary deńgeıin qamtamasyz etedi. Salyq tóleýshilerdiń jańa kabınetinde bir mezgilde 100 myńnan 250 myń paıdalanýshyǵa deıin jumys isteý múmkindigi ulǵaıtyldy. Qujattardy óńdeý ýaqyty bir saǵattan 1 mınýtqa deıin qysqardy, — dedi ol.
Ánýar Súleımenovtiń atap ótýinshe, Astana-1 júıesi kedendik protsesterdi avtomattandyrady. Syrtqy ekonomıkalyq qyzmetke qatysýshylardyń qashyqtyqtan ózara is-qımylyn engizedi jáne jasandy ıntellekt elementterin paıdalanady. Intellektýaldy izdeý júzege asyrylyp, málimetterdi toltyrý keńestermen birge júredi.
Buǵan deıin Qazaqstanda jańa Salyq kodeksi aıasynda tsıfrlyq aktıvterdi retteýge baǵyttalǵan birneshe normatıvtik quqyqtyq akt (NQA) ázirlenip jatqanyn jazǵan edik.