Memlekettik kirister komıteti 200 eýrolyq bajsyz ákelý shegine qatysty túsinik berdi
ASTANA. KAZINFORM – Eýrazııalyq ekonomıkalyq komıssııa keńesiniń sheshimimen Eýrazııalyq ekonomıkalyq odaqqa (EAEO) múshe memleketter úshin taýarlardy bajsyz ákelý shegi 200 eýro kóleminde belgilendi. Bul týraly QR Qarjy mınıstrligi Memlekettik kirister komıteti Kedendik ádisnama basqarmasynyń bas sarapshysy Marhabat Omarova «Ashyq úkimet» portalynda málim etti.
Onyń aıtýynsha, uzaq talqylaýlardyń nátıjesinde 200 eýro mólsherindegi shek jeke paıdalanýǵa arnalǵan taýarlardy bajsyz ákelýdiń qoldanystaǵy normasymen birdeı deńgeıde bekitildi.
– Elektrondyq saýda arqyly alynatyn taýarlar úshin tek quny 200 eýroǵa deıingi taýarlardy bajsyz ákelý shegi belgilengen. Bul jeke paıdalanýǵa arnalǵan taýarlarǵa qatysty 200 eýrolyq shekpen sáıkes keledi. Degenmen, kishkene aıyrmashylyq bar. Jeke paıdalanýǵa arnalǵan taýarlarǵa 31 kg salmaq shekteýi qoldanylady, al elektrondyq saýda taýarlary úshin mundaı shekteý belgilenbegen, – dedi sarapshy.
Sonymen qatar Marhabat Omarova bajsyz ákelý sheginiń ózgerýi kedendik retteýmen qatar, EAEO-ǵa múshe elderdegi ekonomıkalyq ahýalǵa da tikeleı baılanysty ekenin atap ótti. Sheshim qabyldaý kezinde ishki naryqqa yqpaly, onlaın jáne oflaın saýda arasyndaǵy teńgerim, sondaı-aq áleýmettik-ekonomıkalyq faktorlar eskeriledi.
– Osy ýaqytqa deıin elektrondyq saýda taýarlaryna qatysty jańa kedendik retteý kúshine engen joq. Júrgizilip jatqan pılottyq joba sheńberinde kedendik tólemder jeke paıdalanýǵa arnalǵan taýarlarǵa qatysty erejeler negizinde alynady, – dedi vedomstvo ókili.
Marhabat Omarova jańa tártip kúshine engennen keıin elektrondyq saýda taýarlaryna taýar qunynyń 5 paıyzy mólsherinde, biraq ár kelisi úshin keminde 1 eýro kóleminde baj salyǵy jáne qosylǵan qun salyǵy (QQS) tólenedi dep atap ótti.
Sarapshynyń málimetinshe, elektrondyq saýda taýarlaryna deklaratsııany elektrondyq saýda operatorlary da, jeke tulǵalar da tapsyra alady. Deklarant deklaratsııada kórsetilgen málimetterdiń durystyǵyna, kedendik tólemderdiń ýaqytyly tólenýine jáne keden zańnamasy talaptarynyń saqtalýyna jaýapty bolady.
Qazirgi tańda pılottyq jobaǵa osy salada tájirıbesi bar tórt kompanııa qatysyp otyr. Al elektrondyq saýdaǵa qatysty jańa erejeler kúshine engennen keıin operatorlar sanyna shekteý qoıylmaıdy. Tıisti tizilimge engizý talaptaryna saı keletin zańdy tulǵalar elektrondyq saýda operatory mártebesin ala alady.
Buǵan deıin Memlekettik kirester komıteti qandaı marketpleısterge jańa kedendik talap qoıylmaıtynyn aıtty.
