Memlekettik kirester komıteti qandaı marketpleısterge jańa kedendik talap qoıylmaıtynyn aıtty
ASTANA. KAZINFORM – Eýrazııalyq ekonomıkalyq odaqqa (EAEO) múshe memleketterdiń kedendik aýmaǵynda turatyn, nemese ýaqytsha bolatyn jeke tulǵalardyń sheteldik ınternet-platformalardan ınternet jelisi arqyly satyp alatyn taýarlaryna qatysty jańa kedendik retteý engiziledi.
Atap aıtqanda, jańa tártip ınternet-dúken arqyly júzege asyrylatyn V2S (business-to-consumer) formatyndaǵy saýdaǵa, ıaǵnı satýshy zańdy tulǵa, al satyp alýshy jeke tulǵa bolǵan jaǵdaıda qoldanylady.
Sonymen qatar ózgerister EAEO aýmaǵyna burynnan ákelingen jáne Wildberries, Ozon, Kaspi.kz sııaqty jergilikti ınternet-alańdar arqyly satylatyn taýarlarǵa qoldanylmaıdy. Osylaısha, jeke paıdalanýǵa arnalǵan quny 200 eýrodan aspaıtyn taýarlarǵa tapsyrys beretin satyp alýshylardyń basym bóligi úshin satyp alý jáne sálemdemeni alý tártibi burynǵydaı saqtalady.
Osyǵan baılanysty QR Qarjy mınıstrligi Memlekettik kirister komıteti Kedendik ádisnama basqarmasynyń bas sarapshysy Marhabat Omarova «Ashyq úkimet» portalynda Wildberries, Ozon t.b. platformalary arqyly satyp alynatyn taýarlarǵa jańa ózgeristerdiń qoldanylmaýynyń sebebin túsindirdi.
Ýákiletti organnyń málimetinshe, Wildberries, Ozon jáne Kaspi.kz sııaqty ınternet-alańdar EAEO aýmaǵynda, ıaǵnı odaqqa múshe memleketter arasynda saýda júrgizedi. Sondyqtan bul platformalarda satylatyn taýarlar kedendik resimdeýden ótip qoıǵan jáne sheteldik taýarlar sanatyna jatpaıdy.
Sondaı-aq vedomstvo ókili 200 eýro kólemindegi bajsyz ákelý lımıtiniń bir tapsyrysqa emes, árbir jeke sálemdemege qoldanylatynyn naqtylady.
Temu, AliExpress, iHerb sekildi sheteldik ınternet-platformalardan satyp alynatyn taýarlarǵa qatysty deklaratsııany jeke tulǵalar óz betinshe bere alady nemese elektrondyq saýda operatorlarynyń qyzmetine júgine alady.
– Bul rette deklaratsııa bergeni úshin qandaı da bir qosymsha aqy alý máselelerin, sondaı-aq mundaı qyzmettiń qunyn operatorlar belgileıdi. Alaıda, qolda bar aqparat boıynsha "Qazposhta" AQ jáne t.b. sııaqty qyzmettiń osy túrimen aınalysatyn kompanııalardyń kópshiligi quny bajsyz ákelý sheginen aspaıtyn taýarlar úshin óz qyzmetteri úshin aqy almaıtynyn atap ótemiz, – dep habarlady sarapshy.
Aıta keteıik, 2023 jyldan beri júzege asyrylyp kele jatqan pılottyq jobaǵa «Qazposhta» AQ, «DHL Interneshnl Kazahstan» JShS jáne elektrondyq saýdanyń negizgi kólemin tasymaldaıtyn basqa da kompanııalar qatysyp keledi.
Vedomstvonyń málimetinshe, pılottyq joba aıasynda týyndaıtyn problemalyq máseleler kezeń-kezeńimen pysyqtalyp jatyr. Qazirgi ýaqytqa deıin jeke tulǵalardyń sheteldik ınternet-dúkenderden tapsyrys berýine baılanysty qıyndyqtar tirkelmegen.
Aıta keteıik, marketpleıster qazaqstandyq taýarlardy keńinen kórsetýge mindettelýi múmkin ekenin jazǵanbyz.
