Memlekettik qordan ShQO-da aýylda dárigerlik ambýlatorııa salýǵa qarajat bólindi — Úkimet
ASTANA. KAZINFORM – Memleket basshysynyń tapsyrmasyna sáıkes, elimizde zańsyz ıemdelgen aktıvterdi qaıtarý esebinen áleýmettik mańyzy bar ınfraqurylym nysandaryn salý jobalaryn júzege asyrý jalǵasyp otyr. Bul týraly Úkimettiń baspasóz qyzmeti málim etti.
Úkimet Shyǵys Qazaqstan oblysy Shemonaıha aýdany, Volchanka aýylynda dárigerlik ambýlatorııa salý jumystaryn aıaqtaýǵa Arnaýly memlekettik qordan shamamen 67 mln teńge bólý týraly sheshim qabyldady.
Jobanyń jalpy quny 419 mln teńgeni quraıdy. Qarajattyń bir bóligi buryn Úkimet rezervinen jáne oblystyq bıýdjetten bólingen.
Búgingi tańda nysannyń qurylysy 65%-ǵa oryndaldy. Injenerlik jelilerdi — sýmen jabdyqtaý, elektr energııasy jáne kommýnıkatsııalardy júrgizý boıynsha jumystar atqarylýda. Tapsyrý — 2025 jyldyń mamyryna josparlanǵan.
Buǵan deıin Memleket basshysynyń tapsyrmasy boıynsha Úkimet Arnaıy memlekettik qordan Óskemendegi gematologııa ortalyǵynyń qurylysyn aıaqtaýǵa 33,6 mlrd teńge bólgen bolatyn.
Aıta ketý kerek, Qazaqstanda «Aýylda densaýlyq saqtaýdy jańǵyrtý» ulttyq jobasy aıasynda 655 nysannyń: medıtsınalyq jáne feldsherlik-akýsherlik pýnktter, dárigerlik ambýlatorııalar qurylysy josparlanǵan. Búginde 467 nysannyń qurylysy aıaqtaldy. Alǵashqy medıtsınalyq-sanıtarııalyq kómek nysandaryn salýǵa jáne aýrýhanalardy rekonstrýktsııalaýǵa qarajat respýblıkalyq bıýdjetten bólinedi. Budan basqa, qarjylandyrý Arnaýly memlekettik qordan da júrgiziledi. Premer-mınıstr densaýlyq saqtaý mınıstrligi men ákimdikke qalǵan 188 medıtsınalyq nysannyń qurylysyna jáne aýrýhanalardyń qaıta qurylýyna apta saıyn monıtorıng júrgizýdi tapsyrdy.
Buǵan deıin habarlanǵandaı, 292 aýylda eski medıtsınalyq nysandar jańartyldy.