Toqaev memlekettik kompanııalardaǵy jemqorlyqty azaıtýǵa 24 qarashaǵa deıin ýaqyt berdi
ASTANA. KAZINFORM — Memleket basshysy Úkimet pen baqylaýshy organdarǵa sybaılas jemqorlyqqa qatysty quqyqbuzýshylyqtardy barynsha azaıtý jóninde usynys berýdi tapsyrdy, dep habarlaıdy Aqordanyń baspasóz qyzmeti.
Memleket basshysynyń sózinshe, joǵary laýazymǵa ıe bolý — árqashan jáne árdaıym júkteletin joǵary jaýapkershilikti durys túsiný degen sóz.
— Qoǵamymyzda atqaratyn laýazymyna, sińirgen eńbegine ne bolmasa tamyr-tanystaryna, sonyń ishinde týystyq baılanystaryna qaramastan, eshkim de zańnan attap kete almaıdy. Bul — men úshin myzǵymaıtyn, ıaǵnı ózgermeıtin ustanym, — dedi ol.
Qasym-Jomart Toqaev sońǵy kezde biz keıbir kelisimder men sharttardy qaıta qaraǵandaryn, olarǵa qol qoıý qate sheshim bolǵanyn aıtty.
— Biraq bıliktiń kásipkerlerge kedergiler, tosqaýyldar jasaıtyn oıy da, nıeti de joq. Kerisinshe, biz olarǵa árdaıym jan-jaqty qoldaý kórsetip jatyrmyz jáne aldaǵy ýaqytta da solaı bolady. Bárińiz de bilesizder, men kelesi jyldyń 1 qańtarynan bastap shaǵyn kásipkerlikti tekserýge arnalǵan taǵy bir úsh jyldyq moratorıı jarııalaý týraly tapsyrmamdy berdim. Elimizde birtindep ornyǵyp jatqan «Zań men Tártip» quqyqtyq strategııasynyń túpki máni de — osy: ádilettilik qaǵıdatyna jáne zań talaptaryna saı kómekke muqtaj adamdarǵa, sondaı-aq kásiporyndarǵa qoldaý kórsetý, — dedi Prezıdent.
Memleket basshysy jaǵdaı qanshalyqty kúrdeli bolsa da «Samuryq-Qazyna» ulttyq ál-aýqat qorynyń apparaty men memlekettik kompanııalardyń, sonyń ishinde «Qazaqstan temir jolynyń» jumysy toqtap qalmaıdy, úzdiksiz júre beretinin alǵa tartty.
— Memlekettik kompanııalarǵa qarasty barlyq mekemeler qalypty tártippen jumys istep jatyr. Jalpy, buǵan eshqandaı sebep te joq. Kerisinshe, jemqorlyqqa qarsy júrgizilip jatqan kúres ınvestorlar men nesıe berýshilerdiń atalǵan ınstıtýtqa degen senimin arttyryp, olardyń meılinshe tıimdi, ashyq jáne jemisti jumys isteýine múmkindik beredi dep sanaımyn, — dedi ol.
Prezıdent bas prokýratýra jalpy somasy 1,3 trıllıon teńgeden asatyn zańsyz ıemdengen aktıvterdi qaıtarǵanyn eske saldy. Bul qarajat 466 áleýmettik jáne ınfraqurylymdyq nysannyń qurylysyna jumsaldy. Qazirgi tańda 383 nysan, sonyń ishinde medıtsınalyq mekemeler, sýmen jabdyqtaý jelileri, mektepter, sport keshenderi salynyp bitti. Jumys jalǵasa beredi.
— Qalyptasqan jaǵdaıǵa qaraǵanda, nysandar qanshalyqty sapaly salynǵanyn tekserýge sebep bar sııaqty. Óıtkeni nysandardyń, sonyń ishinde joldardyń sapasy talapqa saı bolmaıtyn jaǵdaı jıi kezdesedi. Degenmen osy oqıǵanyń ózi jemqorlyqqa qatysty quqyq buzýshylyqtar memlekettik kompanııalardyń eń osal tusy, ıaǵnı, basty derti ekenin aıqyn kórsetip otyr. Osy oraıda, Úkimet pen baqylaýshy organdar bıyl 24 qarashaǵa deıin sybaılas jemqorlyqqa qatysty quqyqbuzýshylyqtardy barynsha azaıtý, kvazımemlekettik sektordaǵy kompanııalar men olardyń qyzmetkerleriniń jumys sapasyn aıtarlyqtaı jaqsartý jóninde maǵan usynys bersin, — dep tapsyrdy Toqaev.
