Memlekettik kómek shyn muqtaj adamdarǵa ǵana berilýge tıis – Prezıdent
ASTANA. KAZINFORM — Áleýmettik memleket degenimiz – azamattardy áleýmettik tólemderge táýeldi etý emes. Bul eń aldymen, halyqtyń turmys sapasyn, ál-aýqatyn arttyrý degen sóz. Bul jóninde Qazaqstan halqyna Joldaýyn jarııalaý kezinde Prezıdent Qasym-Jomart Toqaev málimdedi.
– Qaıtalap aıtamyn: memlekettik kómek shyn muqtaj adamdarǵa ǵana berilýge tıis. Úkimettiń aldynda turǵan basty mindettiń biri – osy. Jalpy, bul salada ózekti máseleler az emes, soǵan baılanysty Úkimet óz usynysyn, sheshimderin berip jatyr. Qazir qoǵamda osy máseleler boıynsha qyzý talqy júrip jatyr. Azamattar ózderin alańdatqan máselelerdi ashyq aıtyp jatyr. Sondyqtan bul kúrdeli máseleni «ógizdi óltirmeı, arbany syndyrmaı», baıyppen, salmaqty kózqaraspen sheshý qajet. Artyq qylamyn dep, tyrtyq qylýǵa múldem bolmaıdy, – dedi ol.
Memleket basshysynyń sózinshe, kez kelgen reforma tereń saraptalyp, muqııat zerttelip, azamattardyń jaǵdaıyn meılinshe eskere otyryp júrgizilýge tıis.
– Áleýmettik kómektiń jańa tásilderin, soǵan qatysty aqparattyq júıelerdiń qyzmetin aldyn ala muqııat tekseristen ótkizý qajet. Eń durysy, ondaı jobalardy áýeli pılottyq rejımde iske qosyp, tıimdiligi rastalǵan soń ǵana keń aýqymda qoldaný kerek. Túptep kelgende, áleýmettik memleket degenimiz – azamattardy áleýmettik tólemderge táýeldi etý emes. Bul eń aldymen, halyqtyń turmys sapasyn, ál-aýqatyn arttyrý degen sóz. Sondyqtan biz adam kapıtalynyń sapasyn jaqsartýǵa jáne óskeleń urpaqtyń jan-jaqty damýyna qolaıly jaǵdaı jasaýǵa basa mán berip otyrmyz, – dedi ol.
Aıta keteıik, buǵan deıin 1 qańtardan ýchaskelik qyzmet mamandarynyń jalaqysy 40 paıyzǵa deıin artatyny Joldaýda aıtylǵanyn jazǵanbyz.
