Memlekettik kólikter aýktsıony: 3 500-den astam avto satylǵan
ASTANA. KAZINFORM — Memlekettik mekemeler mingen qyzmettik kólikterdiń keıin qaıda ketetini kópshilikke qyzyq. Biri olardy esepten shyǵarady dep oılasa, endi biri sheneýnikterdiń kóligi jabyq túrde satylatynyna senedi. Alaıda bul avtokólikterdiń basym bóligi ashyq elektrondy aýktsıon arqyly jańa ıesin tabady.
Qarjy mınıstrliginiń Memlekettik múlik jáne jekeshelendirý komıtetiniń Kazinform agenttiginiń resmı saýalyna joldaǵan jaýabyna súıensek, 2020 jyldan beri memlekettik organdar men respýblıkalyq zańdy tulǵalardyń balansyndaǵy 3 500-den astam avtomobıl satylǵan.
Vedomstvo málimetinshe, qyzmettik kólikterdi ótkizý jekeshelendirý rásimi aıasynda júzege asyrylady. Saýda-sattyq Memlekettik múlik tiziliminiń e-kazyna veb-portalynda elektrondy formatta ótedi.
— Sońǵy 6 jylda osyndaı aýktsıondar arqyly satylǵan avtokólikterden memleket qazynasyna 5 mlrd teńgeden astam qarajat túsken. Zańnamaǵa sáıkes, respýblıkalyq menshikti jekeshelendirýden túsken qarjy Ulttyq qorǵa aýdarylady. Memlekettik organdar kólikterin kez kelgen jaǵdaıda satylymǵa shyǵara bermeıdi. Ádette artyq qalǵan, uzaq ýaqyt paıdalanylǵan nemese ári qaraı ustaý shyǵyny tıimsiz dep tanylǵan avtokólikter aýktsıonǵa qoıylady, — delingen qujatta.
Komıtet deregine qaraǵanda, bıyl 1 mamyrdaǵy jaǵdaı boıynsha memlekettik organdar men respýblıkalyq uıymdardyń balansyndaǵy 183 avtomobıl saýda-sattyqqa shyǵarylǵan.
Aýktsıonǵa qatysý tártibi de túsinikti. Qazaqstan azamattary men memlekettik emes zańdy tulǵalar e-kazyna veb-portalyna tirkelip, kepildik jarna tólegennen keıin saýda-sattyqqa qatysa alady. Kepildik jarna mólsheri lottyń bastapqy baǵasynyń 15 paıyzyn quraıdy.
Memlekettik múlikti satý tolyq elektrondy júıe arqyly júrgiziletindikten, qatysýshylar týraly málimetter aýktsıon aıaqtalǵanǵa deıin jarııa etilmeıdi. Jeńimpaz da avtomatty túrde anyqtalady.
Eske sala keteıik, e-qazyna.kz portalynda 10 jylǵa sottalǵan Perızat Qaırattyń da MERSEDES-BENZ S450 markaly kóligi satylǵan bolatyn.
