Memlekettik qoldaýmen jaryq kórgen fılmderden 351 mln teńge kiris tústi
ASTANA. KAZINFORM — Qazaqstanda 2023 jylǵy qańtardan 2026 jylǵy tamyzǵa deıin. bıýdjet qarajaty esebinen ekranǵa shyqqan fılmderdiń prokatynan Memlekettik ulttyq kınony qoldaý ortalyǵyna 351,4 mln teńge túsken. Bul týraly Mádenıet jáne aqparat mınıstrligi Kazinform agenttiginiń resmı saýalyna bergen jaýabynda málimdedi.
Vedomstvonyń málimetinshe, Kıno ortalyǵy kommertsııalyq emes uıym retinde ózi óndirýge qatysqan fılmderdi prokatqa shyǵarý jáne ótkizý quqyqtarynyń barlyǵyn óndirýshiler men prodıýserlerge beredi.
Qoldanystaǵy zańnamaǵa sáıkes, osy tabystyń 20 paıyzy Kıno ortalyǵyna aýdarylady.
— 2023 jylǵy qańtardan 2026 jylǵy tamyzǵa deıin osyndaı túsimderdiń jalpy somasy — 351,4 mln teńge, — delingen Mádenıet mınıstrliginiń jaýabynda.
Mınıstrlik memlekettik qoldaýdyń tıimdiligin baǵalaý kezinde fılmniń qarjylyq qaıtarymyn ǵana basshylyqqa almaıdy. Baǵalaý ólshemderine sharttyq mindettemelerdiń oryndalýy, óndiristiń aıaqtalýy, kórermen qamtylymy, prokat nátıjeleri, fılmdi halyqaralyq deńgeıde ilgeriletý kórsetkishteri men festıvalderdegi nátıjeleri, sondaı-aq jobanyń mádenı, aǵartýshylyq jáne áleýmettik mańyzy kiredi.
Sonymen qatar Mádenıet jáne aqparat mınıstrligi ulttyq tarıhı-mádenı murany saqtaý, memlekettik tildi damytý, jas kınematografısterdi qoldaý, avtorlyq, derekti jáne anımatsııalyq kınony damytý mańyzdy mindetterdiń biri bolyp qala beretinin habarlady.
Aıta keteıik, buǵan deıin, Qazaqstan qalalarynda kıno bıletiniń qunyn jazǵan edik.
