Memlekettik qoldaý kórsetkende beıresmı tabys ta esepke alynady – Eńbek mınıstrligi

ASTANA. KAZINFORM – Kómekke muqtaj qazaqstandyqtarǵa áleýmettik-memlekettik qoldaý kezinde resmı tabysynan bólek qosymsha kirisi de eskeriledi.

Sebebi memlekettik qoldaý tek qana asa muqtaj jandarǵa berilýi tıis. Bul oıdy Eńbek jáne halyqty áleýmettik qorǵaý vıtse-mınıstri Oljas Anafın alǵa tartyp otyr.

- Memlekettik qoldaý sharalaryn bólýde muqtajdyqtyń aıqyn jáne obektıvti qaǵıdatyna kóshemiz. Kómek kórsetý kezinde tabys pen múlik qana eskerilmeıdi, sonymen qatar táýeldilik aýyrtpalyǵy da eskeriledi. Onyń ishinde otbasynda naqty qansha adam jumys isteıdi, qanshasy ekonomıkalyq turǵydan belsendi emes. Sondaı-aq jalǵan kiristi, páter jaldaý nemese beıresmı jumyspen aınalysýdan túsken tabysty da anyqtaıtyn bolamyz, - dedi Oljas Anafın ortalyq kommýnıkatsııalar qyzmeti alańynda ótken baspasóz máslıhatynda.

Odan ári mınıstrdiń orynbasary respýblıkalyq bıýdjetten bólinetin kepildendirilgen tólem saqtalatynyn aıtty.

- Zeınetaqy, kóp balaǵa arnalǵan, bala týǵandaǵy járdemaqy jáne bala kútimi boıynsha 1,5 jasqa deıingi járdemaqy, múgedektigi, asyraýshysynan aırylǵan jaǵdaıda beriletin járdemaqy jáne basqa tólemder tolyq kólemde júrgiziledi. Sonymen qatar ataýly áleýmettik kómek jáne mindetti áleýmettik saqtandyrý qorynyń 5 áleýmettik tólem túri sol kólemde saqtalady, - dep sendirdi vıtse-mınıstr.

Buǵan deıin elimizde zeınetaqyny avtomatty túrde taǵaıyndaıtyn pılottyq joba toqtatylǵany týraly habarlaǵan edik. 

Aıta keteıik, shetelde zańsyz eńbek etken qazaqstandyqtarǵa endigi ýaqytta sanktsııalyq shara qoldanylady.