Memlekettik qoldaý erejeleri ózgerdi: bızneske jańa talaptar qoıyldy
ASTANA.KAZINFORM — Qazaqstanda ónerkásipti memlekettik qoldaý sharalaryn retteıtin quqyqtyq aktiler ózektilendirildi. Oǵan sáıkes qoldaý alǵan kompanııalar memleket aldynda qarsy mindettemeler qabyldaıdy. Tıisti jumys Joǵary aýdıtorlyq palata nusqamasy boıynsha júrgizildi. Bul týraly Joǵary aýdıtorlyq palatasy málim etti.
Mundaı sharalar qabyldaý qajettiligi Joǵary aýdıtorlyq palata júrgizgen bıznesti memlekettik qoldaý tıimdiligine aýdıt qorytyndysy boıynsha anyqtaldy.
— QR Saýda jáne ıntegratsııa mınıstrligine ónerkásiptik kásiporyndarǵa memlekettik qoldaý kórsetý qaǵıdalaryn jańartý tapsyryldy. Atap aıtqanda: eksporttyq jáne eksport aldyndaǵy qarjylandyrý, saqtandyrý, qaıta saqtandyrý jáne shıkizattyq emes eksportty ilgeriletý jónindegi mámilelerge kepildik berý túrindegi qoldaý sharalaryn alatyn kompanııalar úshin qarsy mindettemelerdi naqty belgileý tapsyryldy, — delingen habarlamada.
Búgingi tańda barlyq qajetti túzetý kúshine endi.
— Sonymen qatar Joǵary aýdıtorlyq palata usynymy boıynsha Saýda mınıstrligi ishki saýda sýbektilerine memlekettik qoldaý kórsetý qaǵıdalaryna túzetýler engizdi. Olar 2026 jylǵy 12 shildeden bastap qoldanysqa enedi. Atap aıtqanda, qoldaý alý úshin qajetti qujattardyń tolyq tizbesi anyqtaldy, syıaqy mólsherlemesiniń bir bóligin sýbsıdııalaý jáne kredıtter boıynsha kepildik berý sharttarynyń úlgilik nysandaryna, sondaı-aq ishki saýda sýbektileriniń qarsy mindettemelerdi oryndaýyn baqylaý tártibine ózgerister engizildi, — dep habarlady palatadan.
Bul ózgerister memlekettik qoldaýdyń ashyqtyǵyn arttyrýǵa, onyń formaldi paıdalanylý táýekelin tómendetýge jáne bıýdjettik salymdardan túsetin qaıtarymdy arttyrýǵa baǵyttalǵan.
Eske sala keteıik, jeke kompanııalar endi áleýmettik mańyzy bar azyq-túlik taýarlarynyń baǵasyn turaqtandyrý maqsatynda saqtandyrý sharttaryn óz qaryzdaryn qamtamasyz etý quraly retinde paıdalana almaıdy. QR Aýyl sharýashylyǵy mınıstrligi Joǵary aýdıtorlyq palatanyń nusqamasy negizinde tıisti ózgeristerdi bekitti.
