Memlekettik qoldaý alýǵa ótinim bergen kásipkerdiń basty problemalary qandaı
ASTANA. KAZINFORM – Úkimet otyrysynan keıingi baspasóz máslıhatynda «Damý» kásipkerlikti damytý qory» AQ basqarma tóraǵasy Farhat Sársekeev memlekettik qoldaý alýǵa ótinim bergen kásipkerlerdiń basty problemalaryn atady.
- Kásipkerler memlekettik qoldaý alýǵa ótinish bildirgen kezde kezdesetin negizgi problemalardy atap óteıin. Birinshi kezekte, bul – kredıttik tarıh. Nesıe alǵysy keletin azamattardyń, eń aldymen, kredıttik tarıhy jaqsy bolýy mańyzdy. Ekinshi másele – kepilzattyń jetkiliksizdigi. Bul problemany sheshý úshin biz kepildik beremiz. Atap aıtqanda, 3,5 mlrd teńgege deıingi soma boıynsha qaryzdyń 85 paıyzyna deıin kepildik usynamyz, - dedi ol tilshiler saýalyna oraı.
Onyń aıtýynsha, úshinshi másele – kásipkerdiń óz qarajatynyń bolmaýy. Kópshiliginde jeke qarajaty jetkiliksiz.
- Shaǵyn bıznespen aınalysqysy keletin azamattarǵa bul iske belgili bir jınaqpen kelý kerektigin aıtamyz. Sońǵy másele – jobalardyń jetkilikti deńgeıde daıyndalmaýy. Kásibin jańadan bastaǵysy keletin nemese jańa baǵytty ıgerýdi josparlap otyrǵan kásipkerler aldyn ala daıyndalýy qajet. Bul ýnıversıtetke túsý sııaqty. Kásip ashý úshin de daıyndyq kerek. Demek, marketıngtik jáne smetalyq esepteri, shıkizatty qaıdan satyp alatyny, ónimdi kimge satatyny, jobanyń rentabeldiligi jáne taǵy basqa máseleler qamtylǵan bıznes-jospar bolýy tıis, - dedi basqarma basshysy.
Farhat Sársekeev kásibin jańadan bastaýshylarǵa «Armannan iske» dep atalatyn pılottyq baǵdarlamanyń iske qosylǵanyn aıtady.
- Eki qalada demo-kún ótkizip, óte jaqsy jobalardy iriktep aldyq. Baǵdarlamanyń máni nede? Jasy 30 ben 55 aralyǵyndaǵy, jumys tájirıbesi, jaqsy kredıttik tarıhy jáne belgili bir jınaǵy bar jas kásipkerlerdi akseleratsııadan ótkizemiz. Eki jyl ishinde Human Capital kompanııasyn jaldadyq. Ol kásipkerlerdiń bıznes-josparlaryn qarjylandyrýǵa daıyndaý úshin akseleratsııa júrgizedi. Eki aıdyń qorytyndysy boıynsha komıssııa ótkizip, jobalardy irikteımiz jáne qarjylandyrýǵa jiberemiz. Ótken aptada Almatyda demo-kún ótkizdik. Oǵan deıin Astanada uıymdastyrǵan edik. Al jeltoqsan aıynyń basynda Shymkent qalasynda ótkizýdi josparlap otyrmyz. Ázirge bul – pılottyq baǵdarlama. Eger onyń nátıjesi jaqsy bolsa, baǵdarlamany keńeıtip, memlekettik qoldaý deńgeıine shyǵarýdy josparlap otyrmyz, - dedi ol.
Aıta keteıik, «Báıterek» ulttyq basqarýshy holdıngi bıyl toǵyz aıda ekonomıkaǵa 8,7 trln teńgege qoldaý kórsetti.