Memlekettik qyzmetterdiń tek 3 paıyzy ǵana proaktıvti formatta kórsetiledi
ASTANA. KAZINFORM — Qazaqstandyqtarǵa kórsetiletin memlekettik qyzmetterdiń 3%-y ǵana proaktıvti negizde (eshbir ótinish pen qujat jınamaı-aq, avtomatty túrde) kórsetilgen. Bul týraly Memlekettik qyzmet isteri agenttiginde agenttik tóraǵasy Darhan Jazyqbaı servıstik memlekettik apparatty jetildirý jónindegi konsýltatıvtik-saraptamalyq toptyń kezekti otyrysynda aıtty.
Premer-Mınıstrdiń tapsyrmasy boıynsha tıisti mınıstrliktermen birge «Azamattarǵa arnalǵan úkimet» memlekettik korporatsııasynyń, «Ulttyq aqparattyq tehnologııalar» AQ jáne 29 ortalyq organ ókilderiniń qatysýymen tıisti tizilimge engizilgen barlyq memlekettik kórsetiletin qyzmet boıynsha tyńdaý uıymdastyrǵan.
Qoldanystaǵy tizilimdi taldaý nátıjesinde memlekettik qyzmettiń tek 3% — proaktıvti formatta, 8% — kompozıttik, al 68% — eksaýmaqtyq tásildermen kórsetiletini anyqtaldy.
«Agenttik ázirlegen 17 baǵyt boıynsha memlekettik qyzmet kórsetý rásimin jetildirý jóninde arnaıy bólim arqyly memlekettik basqarýdy tsıfrlyq transformatsııalaý qaǵıdalaryn qaıta qaraý usynyldy. Júrgizilgen taldaý nátıjesinde agenttik 30 memlekettik kórsetiletin qyzmetti eksaýmaqtyq formatqa, 251 memlekettik kórsetiletin qyzmetti proaktıvti formatqa, 72 memlekettik kórsetiletin qyzmetti kompozıttik formatqa aýystyrý týraly, sondaı-aq, memlekettik qyzmet kórsetý merzimin qysqartý boıynsha 273 usynys ázirledi. Bul qaǵıdalardy memlekettik qyzmetter kórsetýdiń bıznes-protsesterine reınjınırıng júrgizý jáne olardy kórsetý qaǵıdalaryn ázirleý kezinde memlekettik organdar basshylyqqa alady», — deıdi Darhan Jazyqbaı.
Onyń aıtýynsha, keıbir memlekettik qyzmetterdi kórsetý merziminiń basym bóligi memlekettik organdarmen kelisý rásimine jumsalyp jatyr.
Osyǵan baılanysty agenttik kelisý rásimi bar qyzmetterdiń bıznes-protsesterin avtomattandyrýdy usynyp otyr.
Taldaý kezinde qyzmet kórsetý merzimin esepteýdiń biryńǵaı tásili joq ekeni anyqtalǵan.
«Máselen, normatıvtik quqyqtyq aktilerge sáıkes qyzmet kórsetý merzimi jumys nemese kúntizbelik kúndermen eseptelýi múmkin. Osyǵan oraı, agenttik tarapynan qyzmet kórsetý merzimin kúntizbelik kúnderden jumys kúnderine aýystyrý máselesin qarastyrýdy usynyp otyr», — deıdi agenttik basshysy.
