Memlekettik qyzmetterdi azamattar chat arqyly ala alady – Vıtse-mınıstr

Onyń sózinshe, jasandy ıntellektini memlekettik qyzmet kórsetý jáne azamattardyń ótinishterimen jumys isteý úderisterine engizý tek Qazaqstanda ǵana emes, álemniń kóptegen elinde qolǵa alynǵan.

– Memlekettik qyzmetterge jasandy ıntellektini engizý birtindep memleket pen azamat arasyndaǵy kommýnıkatsııanyń jańa formatyn qalyptastyryp jatyr. Bul úderis Qazaqstanda ǵana emes, búkil álemde júrip jatyr, – dedi spıker.

Ol AQSh-ta memlekettik qyzmetterdi bir portalǵa biriktirý boıynsha qolǵa alynǵan jobany mysal retinde keltirdi. Onyń aıtýynsha, jańa júıede dástúrli portaldardaǵydaı qyzmet sanattaryn izdeý nemese qajetti bólimdi tańdaý tásilinen góri chat arqyly ózara árekettesýge basymdyq berilgen.

– Biz dástúrli memlekettik portaldarǵa úırenip qaldyq. Onda qajetti qyzmetti sanattar arqyly izdep, onyń qalaı alynatynyn túsindiretin aqparatpen tanysamyz. Al jańa tásilde paıdalanýshy júıemen chat formatynda sóılesedi. Qajetti qyzmetti sanattardan izdeýdiń qajeti joq, óz suranysyn qarapaıym tilmen jazady, – dedi ol.

Spıkerdiń pikirinshe, mundaı formatqa birden beıimdelý ońaı emes. Degenmen bul memleket pen azamat arasyndaǵy tsıfrlyq kommýnıkatsııanyń bolashaǵy.

Qazaqstanda da osy baǵytta birqatar sheshim engizilip jatyr. Spıkerdiń aıtýynsha, ótken jyly memlekettik qyzmetter boıynsha keńes beretin jasandy ıntellekt negizindegi qural iske qosylǵan.

Bıyl bul júıeniń múmkindikteri keńeıtilip, keıbir memlekettik qyzmetterdi chat formatynda alýǵa múmkindik beretin jańa fýnktsııalar iske qosylǵan.

– Mysaly, balańyzdy mektepke bergińiz kelse, júıege osy nıetińizdi jaı ǵana jazasyz. Ol sizdiń balalaryńyzdyń tizimin kórsetip, qaı balany mektepke bergińiz keletinin suraıdy. Balany tańdaǵannan keıin júıe onyń tirkelgen mekenjaıyna sáıkes keletin jaqyn mektepterdi kórsetedi. Mektepti kartadan tańdap, qajetti rásimderdi sol chattyń ishinde jalǵastyrýǵa bolady, – dedi spıker.

Onyń aıtýynsha, bul tásil memlekettik qyzmetti azamattyń ózi izdep, birneshe tsıfrlyq resýrsty aralaýyna emes, kerisinshe azamattyń suranysyn jasandy ıntellektiniń túsinip, qajetti qyzmetke baǵyttaýyna negizdeledi.

Qazir memlekettik organdarda túrli baǵyttarǵa arnalǵan tsıfrlyq assıstentter de bar. Olardyń qatarynda salyq máseleleri boıynsha keńes beretin, áleýmettik máselelerge qatysty aqparat usynatyn jáne jumys izdeýge kómektesetin sheshimder bar.

Spıkerdiń pikirinshe, jasandy ıntellekt negizindegi mundaı agentter kóbeıgen saıyn olardyń ózara baılanysyn qamtamasyz etetin biryńǵaı júıe qajet.

– Azamattar men memleket, bıznes pen memleket arasyndaǵy kommýnıkatsııada qoldanylatyn kez kelgen agent memlekettik qyzmetterdiń biryńǵaı ekojúıesine qosylýy kerek dep sanaımyz. Ol úshin memlekettik qyzmetter men múmkindikterdiń barlyǵyn biriktiretin ámbebap júıe qajet, – dedi ol.

Onyń aıtýynsha, bolashaqta azamat memlekettik qyzmetterdi arnaıy saıttan izdeýmen shektelmeı, ózine yńǵaıly kommýnıkatsııa arnasy arqyly ala alady. Bul chat, tsıfrlyq assıstent nemese áleýmettik jelilerdegi ınterfeıs bolýy múmkin.

– Biz muny memleketpen ózara is-qımyldyń jańa tásili dep sanaımyz. Negizgi maqsat tehnologııany jaı ǵana engizý emes, azamat úshin eldegi memlekettik qyzmetterdi barynsha yńǵaıly jáne túsinikti etý, – dep túıindedi spıker.

Buǵan deıin tsıfrlyq memleket qurýda derekterdiń róli qandaı ekenin jazǵanbyz.