Memlekettik qyzmette tsıfrlandyrý men kadrlyq irikteýdiń jańa kezeńi bastaldy
ASTANA. KAZINFORM — Búgin Memlekettik qyzmet isteri agenttiginde 2025 jyldyń nátıjeleri boıynsha Agenttiktiń keńeıtilgen alqa otyrysy ótti. Bul týraly agenttiktiń baspasóz qyzmeti málim etti.
Іs-sharaǵa Prezıdent Ákimshiliginiń ókilderi, Parlament Májilisiniń depýtattary, Ulttyq qaýipsizdik komıteti basshylyǵy, Prezıdent janyndaǵy Memlekettik basqarý akademııasy, Agenttik janyndaǵy Qoǵamdyq keńes, Ádep jónindegi komıssııa, Bıýrokratııadan aryltý jáne sybaılas jemqorlyqqa qarsy saıasatty iske asyrý jónindegi konsýltatıvtik-saraptamalyqtop músheleri, sondaı-aq Agenttiktiń aýmaqtyq bólimsheleri men Memlekettik basqarý akademııasynyń fılıaldary onlaın qatysty.
Alqa otyrysynda Agenttik tóraǵasy Darhan Jazyqbaı 2025 jyl memlekettik qyzmet júıesi ınstıtýtsıonaldyq turǵydan jańǵyrtylǵan jyl bolǵanyn atap ótti.
— 2025 jyly memlekettik qyzmetti damytýdyń 2024-2029 jyldarǵa arnalǵan Tujyrymdamasyn júzege asyrý maqsatynda «Qazaqstan Respýblıkasynyń memlekettik qyzmeti týraly» jańa zań jobasy ázirlenip, jeltoqsan aıynda Parlament Májilisiniń qaraýyna engizildi. Bul jańa zań jobasy qazirgideı tek eńbek qatynastaryn ıaǵnı, memlekettik qyzmetke kirý, ótkerý jáne ony toqtatý máselelerin retteýmen shektelmeı, eń bastysy memlekettik qyzmetshilerdiń minez-qulqynyń adamǵa baǵdarlanǵan úlgisin bekitýdi kózdeıdi, — delingen habarlamada.
Ótken jyly Prezıdenttik jastar kadr rezervine tórtinshi irikteý kezeńi ótkizildi. Nátıjesinde rezerv 6 baǵyt boıynsha 50 salalyq bilikti mamanmen tolyqty. Jobaǵa qyzyǵýshylyq artyp keledi. Eger 2019 jyly 13 myń azamat qatysýǵa nıet bildirse, 2025 jyly bul kórsetkish 32 myńǵa jetti. Jalpy rezervke alynǵan 450 azamattyń 337-si búginde túrli salalarda eńbek etip júr.
Óńirlik kadr rezervteri de naqty nátıje kórsetti. 538 rezervshiniń 260-y jańa laýazymdarǵa taǵaıyndalyp, olardyń 193-i jergilikti atqarýshy organdarda basshylyq qyzmetke ornalasty.
Sonymen qatar, talanttardy tartýdyń ózge de tetikteri qoldanylyp jatyr. 735 úzdik túlek (GPA 3,33-ten tómen emes) konkýrstan tys aýyldyq jáne aýdandyq deńgeıdegi laýazymdarǵa qabyldandy. Agenttik 964 joǵary laýazymǵa konkýrssyz taǵaıyndaýdy kelisip, olardyń 19,5%-y kvazımemlekettik jáne jeke sektor ókilderi boldy.
— Byltyr memlekettik qyzmetke irikteý jáne kadrlardy basqarý tolyqtaı tsıfrlandyryldy. Búginde onlaın irikteý 94 memlekettik organdy qamtyp otyr. Tsıfrlyq irikteýdiń tıimdiliginiń nátıjesinde orta eseppen bir bos orynǵa 7 úmitkerden kelip, básekelestik 3,5 esege artty, — dep habarlady agenttikten.
«E-qyzmet» júıesiniń tájirıbesi halyqaralyq deńgeıde joǵary baǵalanyp, memlekettik sektordaǵy úzdik ınnovatsııalyq tájirıbe retinde tanyldy. Qazaqstannyń «E-qyzmet» — personaldy basqarýdyń yqpaldastyrylǵan aqparattyq júıesi Ekonomıkalyq yntymaqtastyq pen damý uıymynyń halyqaralyq OPSI platformasynda ınnovatsııalyq joba retinde jarııalandy. Bul elimizdiń memlekettik qyzmettegi personaldy basqarýdy tsıfrlandyrýdaǵy jetistiginiń halyqaralyq deńgeıde moıyndalýyn bildiredi. OPSI platformasy arqyly Qazaqstannyń tájirıbesi ózge elderge utymdy tájirıbe retinde usynylady. Qazirgi tańda birqatar memleketter qazaqstandyq modelge qyzyǵýshylyq tanytyp otyr.
2025 jyly «Biryńǵaı kadrlyq júıe» arqyly bıýdjettik uıymdardaǵy kadrlyq is júrgizý tolyq avtomattandyryldy. Josparlanǵan 2,4 myń uıymnyń ornyna 2,9 myń uıym júıege qosyldy. 482 myń qyzmetkerdiń tsıfrlyq profıli qalyptastyryldy. Proaktıvti baqylaý tetikteri engizilip, múddeler qaqtyǵysyn avtomatty túrde anyqtaý múmkindigi iske qosyldy.
Jasandy ıntellekt quraldaryn engizý jáne memlekettik qyzmetshilerdi oqytý jumystary jalǵasty. Memlekettik basqarý akademııasynda «Tsıfrlyq memlekettik basqarý» magıstrlik baǵdarlamasy iske qosyldy. «AI Qyzmet» baǵdarlamasy boıynsha 52 myńnan astam ákimshilik qyzmetshi oqytyldy, al «AI Governance 500» baǵdarlamasy aıasynda 100 saıası qyzmetshi bilim aldy.
Memlekettik qyzmet kórsetý salasynda servıstik jáne klıentke baǵdarlanǵan model nyǵaıtyldy. Qashyqtyqtan monıtorıng nátıjesinde 2 600-den astam azamattyń quqyǵy proaktıvti túrde qalpyna keltirildi.
Memlekettik qyzmetshilerdiń quqyqtaryn qorǵaý jáne ádep normalaryn saqtaý máselesine erekshe nazar aýdaryldy. 2025 jyly 19 007 buzýshylyq anyqtaldy. Profılaktıkalyq jumystar aıasynda 28 myńnan astam is-shara ótkizildi.
Memlekettik apparatty bıýrokratııadan aryltý jumystary sheńberinde 1 335 usynys ázirlenip, onyń 406-sy iske asyryldy. Júrgizilgen taldaýlar nátıjesinde mıllıardtaǵan teńge kólemindegi táýekelderdiń aldyn alý sharalary qabyldandy.
Jıyn sońynda Agenttik tóraǵasy 2025 jyly kadrlyq irikteý júıesi jańǵyrtylǵanyn, tsıfrlyq ekojúıe qurylǵanyn, jasandy ıntellekt engizilgenin jáne proaktıvti baqylaý modeli qalyptasqanyn atap ótti. Aldaǵy kezeńde memlekettik qyzmettiń tıimdi, ashyq jáne nátıjege baǵdarlanǵan modelin odan ári damytý jumystary jalǵasady.
Al Prezıdenttik jastar kadr rezervine irikteýden ótkender qaıda jumys isteıtinin myna siltemeden oqyńyz.