Memlekettik qyzmetshiniń ár kúni damý, jańarý, jetilýge baǵyttalýy tıis – Murat Baısalov
ORAL. KAZINFORM – Memlekettik qyzmet júıesiniń tıimdiligi, eń aldymen, kadrlardyń turaqtylyǵymen jáne kásibı daıyndyǵymen ólshenedi. Búginde Batys Qazaqstan oblysy boıynsha 2 096 memlekettik qyzmetshi eńbek etip jatyr. Bul – úlken áleýeti bar korpýs. Taǵy bir mańyzdy kórsetkish – 13 jyldyq ortasha eńbek ótili. Atalǵan qyzmetshilerdiń salada uzaq ýaqyt jumys istep, tájirıbe jınaqtaǵanyn bildiredi. Al laýazymdaǵy ortasha ótil – 4,6 jyl, ıaǵnı kadrlar turaqty, aınalym az. Bul týraly Qazaqstan Respýblıkasy Memlekettik qyzmet isteri agenttiginiń Batys Qazaqstan oblysy boıynsha departamentiniń basshysy Murat Seılbekuly Baısalov aıtyp berdi.
Eseptik kezeńde 311 adam memlekettik qyzmetke taǵaıyndaldy. Ol – jańarý men irikteýdiń júrip jatqanyn kórsetedi. Tańdalǵan kadrlar – bilimi bar, áleýeti zor azamattar.
«Kásibı memlekettik apparat – halyq pen bılik arasyndaǵy altyn kópir», - dep atap ótken Memleket basshysy Qasym-Jomart Toqaevtyń bul sózderi memlekettik qyzmettiń mánin anyqtaıdy.
Óz kezeginde Murat Baısalov osy saladaǵy mańyzdy, aıtýly mindetterge toqtaldy:
Óńirlik kadr rezervi qalyptasty. Óńirlik kadrlyq rezerv – memlekettik qyzmettiń bolashaǵyn qalyptastyratyn, kásibı ári qundylyqqa negizdelgen basqarýshylardy irikteıtin alań. Biz rezervti jaı ǵana kadr bazasy retinde emes, strategııalyq áleýetti qalyptastyrý quraly dep qaraımyz.
Rezervke irikteý — ashyq, básekeli negizde ótedi. Úmitkerler kásibı bilimimen qatar, kóshbasshylyq qabileti, qoǵamdyq belsendiligi jáne qundylyqtyq ustanymdary boıynsha baǵalanady. Іrikteýden ótken tulǵalar – jańa býyn, olar bolashaqta aýyl, aýdan, qala deńgeıinde sheshim qabyldaıtyn mamandar qataryn tolyqtyrady.
Memlekettik qyzmet — turaqtylyq pen jańashyldyqtyń úılesimi. Rezerv osy ekeýin ushtastyryp otyrǵan qural. Rezervtegi mamandardy júıeli túrde oqytý, tálimgerlikpen qamtý jáne naqty jobalarǵa tartý jumystaryn kúsheıttik.
«Kadr – bárin sheshedi» degen sóz eshqashan mańyzyn joǵaltqan emes. Búgingi tańdaǵy mindetimiz – bolashaq ákimder men basshylardy búginnen daıyndaý.
Rezervke engen azamattar arasynan aýdandarda derbes bólim basshylary, oblystyq basqarmalarda bólim basshysy qyzmetine taǵaıyndalǵandar bar. Demek, júıe jumys istep tur, rezervshilerdiń áleýetteri elenip, naqty múmkindikter ashylyp jatyr
Memlekettik qyzmetshilerdiń quqyqtaryn qorǵaý. Zań – barlyǵyna ortaq. Memlekettik qyzmetshiler de ádildikke, qorǵanysqa, ashyqtyqqa quqyly.
Eseptik kezeńde 114 adamnyń buzylǵan quqyqtary qalpyna keltirildi. Atalǵan sannyń artynda shynaıy taǵdyrlar, kásibı bedeli qorǵalǵan adamdar tur. Júıeli jumysymyzdyń arqasynda 6 memlekettik qyzmetshi óz laýazymyna qaıta oraldy nemese olarǵa qabyldanǵan negissiz jáne zańsyz sheshimder qaıta qaraldy.
Biz úshin bul – formaldy statıstıka emes, adamnyń quqyǵynyń ústemdigin is júzinde qamtamasyz etý jolyndaǵy naqty nátıjeler.
Ádep normalaryn saqtaý. Memlekettik qyzmetshi – halyqtyń aldynda turǵan tulǵa, onyń sózinen de, júris-turysynan da memleket kórinedi. Sondyqtan etıkalyq normalardy saqtaý – tek tártip máselesi emes, bul ishki mádenıetti qalyptastyrý.
Ádep keńesiniń úsh otyrysynda tártiptik sıpattaǵy jáne profılaktıkalyq 17 másele qaraldy, 31 naqty usynys jasaldy. Usynystar barlyq memlekettik organdarǵa joldanyp, tolyǵymen oryndaldy. Tártip buzǵan 5 laýazymdy tulǵaǵa shara qoldanyldy, onyń ishinde qyzmetinen bosatylǵandar da bar.
«Etıka – bul memlekettiń ishki mádenıetiniń kórinisi», – degen bolatyn saıasattanýshy Ǵazız Ábishev. Biz de dál osy ustanymmen jumys isteımiz.
Aýyl ákimderiniń oqytylýy. Aýyldyq okrýg ákimderi – eldegi basqarý júıesiniń «aldyńǵy shebi», olar tikeleı halyqpen jumys isteıdi. Sondyqtan olardyń kásibı deńgeıin arttyrý – strategııalyq mindet.
Biz arnaıy uıymdastyrǵan oqý semınarlarynda aýyl ákimderi tek quqyqtyq bilimmen ǵana emes, basqarý mádenıetimen, daǵdarys jaǵdaıyndaǵy sheshim qabyldaý tetikterimen, kommýnıkatsııa quraldarymen de tanysty. Jobalyq basqarý, tsıfrlyq qyzmet kórsetý, derektermen jumys isteý – bári qamtyldy.
Bul – zamanaýı ákimniń beınesine saı bilim berý. Aýyl ákiminiń sheshimi – turǵynnyń turmys sapasyna tikeleı áser etetinin umytpaýymyz kerek.
Memlekettik qyzmet kórsetýdiń sapasy ǵana emes, azamattardyń quqyǵyn qorǵaý da mańyzdy. Memlekettik qyzmet – halyqqa qyzmet kórsetý. Sondyqtan árbir qyzmet alýshynyń quqyǵyn qorǵaý – bizdiń tikeleı mindetimiz. Eseptik kezeńde bizge memlekettik qyzmet kórsetýdiń sapasyna qatysty 16 shaǵym tústi. Bul – azamattardyń belsendiligin, máselelerge beıjaı qaramaıtynyn kórsetedi. Sonyń ishinde 12 shaǵym negizdi dep tanylyp, naqty sharalar qabyldandy: kináli mamandarǵa tártiptik yqpal etý, júıelik kemshilikterdi túzetý boıynsha usynystar engizildi.
Biz árbir ótinishke jaı ǵana esep retinde qaramaımyz – bul naqty azamattyń máselesi, kóńil kúıi, senimi. Sondyqtan árbir aryz boıynsha jan-jaqty saraptama júrgizilip, zań aıasynda sheshim shyǵarylady. Qyzmet alýshylardyń quqyǵy qalpyna keltirilgen jaǵdaıda, biz úshin eń úlken nátıje.
Sonymen qatar, 25 qoǵamdyq qabyldaý, 20 onlaın jármeńke, 11 tikeleı efır ótkizdik – bul quraldar azamattardyń bizge tikeleı júginýine múmkindik beredi. Biz «tyńdaı alatyn memleket» qaǵıdatyn naqty áreketpen kórsetkimiz keledi.
«Azamattyń senimi – memlekettik apparattyń eń basty kapıtaly», – dep atap kórsetken bolatyn Memleket basshysy. Biz osy senimge laıyq bolýǵa bar kúshimizdi salamyz.
Memlekettik qyzmettiń bolashaǵy. Memlekettik qyzmettiń bolashaǵy – azamatqa baǵdarlanǵan, tsıfrlandyrylǵan, kásibı júıe. Bul júıede basty oryn – adamǵa beriledi. Prezıdentimiz aıtqandaı: «Eń aldymen adamdar». Biz osy ustanymdy kúndelikti jumysymyzdyń ózegine aınaldyrdyq.
Bizdiń mindet – halyqqa adal qyzmet etetin, zań men ar-ojdandy basshylyqqa alatyn memlekettik apparat qalyptastyrý. Bul jolda toqtap qalýǵa bolmaıdy – ár kún damý, jańarý, jetilýge baǵyttalýy tıis.