Memlekettik qyzmetshilerge jeke baspana baǵdarlamasy iske qosyla ma – Bektenov jaýaby
ASTANA. KAZINFORM – Premer-mınıstr Oljas Bektenov Májilis depýtattarynyń memlekettik qyzmetshiler úshin bastapqy jarnasyz jáne tómen paıyzdyq mólsherlememen jeke turǵyn úı baǵdarlamasyn iske qosý usynysyna jaýap berdi.
- Qazirgi ýaqytta memlekettik qyzmetshilerdi turǵyn úımen qamtamasyz etý máselesi qoldanystaǵy turǵyn úı saıasaty aıasynda qarastyrylady. Atap aıtqanda, memlekettik qyzmetshiler jeńildetilgen ıpotekalyq baǵdarlamalar, keıinnen satyp alý quqyǵymen jalǵa beriletin turǵyn úı, sondaı-aq jergilikti atqarýshy organdardyń óńirlik turǵyn úı baǵdarlamalaryn qosa alǵanda turǵyn úımen qamtamasyz etýdiń qoldanystaǵy baǵdarlamalaryna jalpy negizde qatysady. Turǵyn úıge muqtaj retinde esepte turǵan azamattarǵa baspana berýdiń qoldanystaǵy tetikteri aıasynda keıinnen jekeshelendirý múmkindigimen jalǵa beriletin turǵyn úı, sondaı-aq ınflıatsııa deńgeıin eskere otyryp jeńildetilgen mólsherlememen «2-10-20» jáne «5-10-20» baǵdarlamalary boıynsha qaryzdar qarastyrylǵan. 2024 jyldan «Naýryz» baǵdarlamasy jáne jergilikti atqarýshy organardyń «Otbasy» bank» AQ-pen birge óńirlik baǵdarlamasy júzege asyrylady, - dedi Oljas Bektenov.
Úkimet basshysynyń atap ótýinshe, «Qazaqstan turǵyn úı kompanııasy» AQ jergilikti atqarýshy organdarmen jasalatyn kelisimder aıasynda baspanaǵa muqtaj retinde esepte turǵan azamattarǵa, onyń ishinde tıisti kezek tizimderine engizilgen memlekettik qyzmetshilerge turǵyn úı berý tetigin júzege asyrady. Atalǵan tetik aıasynda turǵyn úı bastapqy jarnasyz jyldyq 3,1 paıyz syıaqy mólsherlemesimen 20 jylǵa deıingi merzimge keıinnen satyp alý quqyǵymen jalǵa beriledi. Munan bólek, 2025 jylǵy 24 mamyrdan bastap sońǵy 5 jyl ishinde menshiginde turǵyn úıi bolmaǵan jáne Astana, Almaty nemese Shymkent qalalarynyń aýmaǵynda keminde 3 jyl turaqty tirkeýde turǵan eldiń árbir kámeletke tolǵan azamaty turǵyn úıge muqtaj retinde esepke turýǵa quqyly.
- Azamattardyń tólem qabileti suranysyn qoldaý maqsatynda jeńildetilgen ıpotekalyq baǵdarlamalar boıynsha bastapqy jarnanyń bir bóligi jergilikti atqarýshy organdar bóletin turǵyn úı sertıfıkaty arqyly áleýmettik kómek nemese bıýdjet nesıesi túrindegi áleýmettik qoldaý retinde jabylýy múmkin. Osylaısha, ıpotekalyq ónimderdiń jetkilikti sanyn, sondaı-aq Memleket basshysynyń 2026 jylǵy 10 aqpanda Úkimettiń keńeıtilgen otyrysynda bergen tapsyrmalaryn eskere otyryp, bıýdjet qarajatynyń shekteýliligi jaǵdaıynda memlekettik qyzmetshiler úshin bastapqy jarnasyz jáne tómen paıyzdyq mólsherlememen jeke turǵyn úı baǵdarlamasyn iske qosý qoldaý tappaıdy, - dedi Oljas Bektenov.
Buǵan deıin muǵalimderdi baspanamen qamtamasyz etýdiń qandaı tetikteri qarastyrylǵanyn jazǵan edik.