Memlekettik qyzmetshilerge eń jıi syılanatyn syılyq — shapan

ASTANA. KAZINFORM — 2023 jyly memlekettik qyzmetshiler múlik jáne jekeshelendirý komıtetiniń esebine 278 birlik syılyq tapsyrdy. Olardyń jalpy quny 2 mln 324 myń teńgege baǵalandy. Bul týraly Qarjy mınıstrliginiń Kazinform agenttiginiń tilshisi joldaǵan resmı saýal jaýabynda aıtylǵan.

«Ótken jyly Sybaılas jemqorlyqqa qarsy is-qımyl týraly» zańǵa sáıkes, memlekettik qyzmetshiler men ózge de tulǵalar múlik jáne jekeshelendirý komıteti jáne aýmaqtyq bólimshelerge 278 syılyq tapsyrdy», — dep habarlady mınıstrlik.

Onyń ishinde kádesyılar, kartınalar, ydys-aıaq, kosmetıkalyq jáne parfıýmerlik ónimder, kondıterlik ónimder, keńse taýarlary, gúlder, kıim-keshek, tósek-oryn jabdyqtary, syılyq sertıfıkattary, saǵattar, kitaptar, sómkeler, portfelder taǵy basqa syı-sııapat bolǵan.

Syılyqtyń jalpy quny — 2 mln 324 myń teńge.

«2023 jyly komıtet esebine qabyldanǵan syı-sııapattardyń eń qymbattary: shapan jáne bas kıim — 207 myń teńge, PIQUADRO bylǵary portfeli — 180,2 myń teńge, Emporio Armani qolsaǵaty — 135,3 myń teńge», — deıdi vedomstvodan.

Sonymen qatar málimette memlekettik qyzmetshiler alǵan 123 syılyq 840,2 myń teńgege satylǵany aıtylǵan.

Bıyl 1 qańtardaǵy jaǵdaı boıynsha komıtet esebine 87 syılyq tústi.

Buǵan deıin byltyr memleketke qandaı syı-sııapat jasalǵanyn habarlaǵan edik.