Memlekettik qyzmetshilerdiń jalaqysy ósedi
ASTANA. KAZINFORM — QR Parlamenti Senatynyń jalpy otyrysynda «Qazaqstan Respýblıkasynyń memlekettik qyzmeti týraly» zańy men ilespe qujat maquldandy.
Jańa zań 2024-2029 jyldarǵa arnalǵan memlekettik qyzmetti damytý tujyrymdamasyn iske asyrý maqsatynda ázirlengen.
— Jańa zań memlekettik qyzmet júıesiniń tıimdiligin arttyrýǵa, memlekettik qyzmettegi bilikti salalyq mamandardyń tapshylyǵyn toltyrýǵa, sondaı-aq memleket usynatyn qyzmetterdiń sapasy men qoljetimdiligin jáne azamattardyń memlekettik qyzmetshilerdiń jumysyna qanaǵattaný deńgeıin arttyrýǵa, osylaısha azamattardyń memlekettik qyzmetke degen senimin nyǵaıtýǵa múmkindik beredi, — dedi senator Evgenıı Bolgert.
Atalǵan zańda memlekettik qyzmettiń tartymdylyǵyn arttyrýǵa jáne kásibı mamandardy ustap qalýǵa baǵyttalǵan sharalar qarastyrylǵan. Máselen, olardyń jalaqysy keminde úsh jylda bir ret ındekstelip, naryqqa baılanysty kóteriledi. Sondaı-aq, áleýmettik kepildikke aıryqsha nazar aýdarylǵan.
— Memlekettik qyzmetshi basqa eldimekenge aýystyrylsa, oǵan arnaıy tólemder, sonyń ishinde kóterme járdemaqy tólenedi jáne kóshý shyǵyndary óteledi. Eger 25 jyldyq jumys ótili jáne memlekettik nemese vedomstvolyq marapattary bolsa, zeınetke shyqqanda, 4 aılyq mólsherinde bir rettik syıaqy beriledi, — dedi depýtat.
Budan bólek, eńbek demalysyna aqy tólenetin qosymsha kúnder qosylady. Onyń uzaqtyǵy memlekettik qyzmettegi jumys ótiline baılanysty: 10 jyl bolsa — úsh kún, 15 jyl bolsa — bes kún, 20 jyl bolsa — on kún qosymsha demalys qarastyrylǵan.
Aıta keteıik, buǵan deıin memlekettik qyzmetshilerge qoıylatyn talaptar aıqyndalǵanyn jazǵanbyz.
