Memlekettik qyzmetshilerdiń tsıfrlyq reıtıngi engizildi
ASTANA. KAZINFORM — Bul týraly QR Memlekettik qyzmet isteri agenttiginiń tóraǵasy Darhan Jazyqbaı málim etti.
— Qazirgi zamanǵy basym baǵyttardyń birine toqtalsaq, jasandy ıntellekt qoǵam ómiriniń barlyq salasyna qarqynmen ene bastady. Jasandy ıntellektiniń áleýetin adam resýrstaryn basqarýda, memlekettik qyzmetke irikteý men ótkerýde tıimdi paıdalana bilý qajettigi týyndap otyr. Osy oraıda «eQyzmet» júıesinde kadrlyq protsesterin tsıfrlandyrý jumystary atqarylyp jatyr. Prezıdent Ákimshiliginiń bastamasymen memlekettik qyzmet júıesindegi basqarýshy laýazymdardy irikteýge, múddeler qaqtyǵysyna jol bermeýge, mindetterdi bólýge jáne basqa da kadr protsesterine qatysty aqparattyq júıege birqatar ózgeris engizildi. Jekelegen basshylyq laýazymǵa eń laıyq kandıdattardy anyqtaý maqsatynda «eQyzmet» júıesinde tsıfrlyq reıtıng modýli iske qosyldy, — dedi D. Jazyqbaı Memlekettik qyzmet isteri agenttiginiń keńeıtilgen alqa otyrysynda.
Bul modýl elektrondy jeke isterdiń derekteri negizinde saıası jáne «A» korpýsy laýazymdaryna joǵary biliktiligi men tájirıbesi bar áleýetti úmitkerlerdiń tizbesin jasaýǵa múmkindik beredi. Osylaısha, tájirıbesi men biliktiligi, sondaı-aq áleýeti joǵary mamandardyń tizbesi reıtıng túrinde qalyptasady.
— Qazirgi tańda ortalyq memlekettik organdarǵa qarasty uıym basshylarynyń jeke isterin «eQyzmet» júıesinde qalyptastyrý boıynsha jumystar jalǵasyp jatyr. Bul basqarýshylyq laýazymdarǵa memlekettik qyzmetshilermen qatar, ózge de kvazımemlekettik jáne jeke sektordyń kásibı mamandaryn tartýǵa múmindik beredi. Qoldanystaǵy zańnamamen bekitilgen shekteýlerdiń saqtalýyn qamtamasyz etý úshin Agenttik atalǵan modýldiń negizinde qajet analıtıkalyq jáne aqparattyq derekterdi jınaqtaıdy, — dedi agenttik basshysy.
D. Jazyqbaı Memleket basshysynyń memlekettik bıýdjetten qarjylandyrylatyn mekemelerdiń kadr qyzmetin avtomattandyrýdy qamtamasyz etý boıynsha tapsyrmasyn oryndaý aıasynda Biryńǵaı kadr júıesine 8 memlekettik organnyń 19 vedomstvolyq uıymy engizilgenin atap ótti. Osy jyldyń 1 qańtarynan bastap atalǵan júıege 37 memlekettik organnyń 2400-ge jýyq vedomstvoǵa qarasty uıymdaryn qosý boıynsha jumys atqarylyp keledi, onda 500 myńnan astam adam jumys isteıdi.
Buǵan deıin bıyl memlekettik qyzmet salasyndaǵy zańnama qaıta qaralatynyn jazǵan edik.