Memlekettik qyzmetshilerdiń kommýnıkatıvtik daǵdylaryn jetildirýge arnalǵan medıastýdııa ashyldy

ASTANA. KAZINFORM – Prezıdent Ákimshiliginiń memlekettik qyzmetshilerdiń kommýnıkatıvtik daǵdylaryn jetildirý boıynsha bergen tapsyrmasyn oryndaý aıasynda Memlekettik qyzmet isteri agenttiginiń qoldaýymen Prezıdent janyndaǵy Memleket basqarý akademııasynyń bazasynda qurylǵan medıastýdııanyń ashylý sharasy ótti.

QR Memlekettik qyzmet isteri agenttigi baspasóz qyzmetiniń habarlaýynsha, is-sharaǵa Qazaqstan Respýblıkasy Prezıdentiniń ishki saıasat máseleleri jáne kommýnıkatsııalar jónindegi kómekshisi Rýslan Jeldibaı men Memlekettik qyzmet isteri agenttiginiń tóraǵasy Darhan Jazyqbaı qatysty.

Ashylý barysynda Rýslan Jeldibaı memleket pen qoǵam arasyndaǵy senimdi nyǵaıtýda memlekettik qyzmetshilerdiń jurtshylyqpen tıimdi kommýnıkatsııa ornata alý daǵdylaryn únemi damytyp otyrýdyń mańyzdylyǵyn atap ótti.

Zamanaýı medıastýdııa memlekettik qyzmetshilerdi oqytý ádisterin jetildirýge ásirese, jańa tehnologııalardy qoldaný arqyly olardyń pikirtalas, suhbat formatynda sóz sóıleý boıynsha tájirıbesin shyńdaýǵa, olardy is júzinde tıimdi qoldana bilý qabiletin arttyrýǵa yqpal etedi dep kútilýde.

Jańa formattaǵy oqytý protsesin iske asyrý úshin stýdııada Jalinga avtomattandyrylǵan vıdeo jáne grafıkalyq beınelerdi jazý qurylǵysy ornatylǵan, sondaı-aq YouTube, Zoom arqyly onlaın-konferentsııalarǵa qosylý, kásibı podkast jazý alańy qarastyrylǵan.

Shara aıasynda memlekettik qyzmetshilerdiń biliktiligin arttyrý jáne olardy qaıta daıarlaýǵa arnalǵan tsıfrlyq kovorkıng zalynyń jumysy da tanystyryldy.