Memlekettik qyzmetshilerdiń bás tigýine jáne býkmekerlerdi jarnamalaýǵa tyıym salyndy – zań

ASTANA. KAZINFORM – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine oıyn bıznesi, lotereıalar jáne lotereıa qyzmeti máseleleri boıynsha ózgerister men tolyqtyrýlar engizý týraly» Zańy ekinshi oqylymda qaralyp, qabyldandy.

«Ózderińiz biletindeı, bul eń kóp talqylanǵan zań jobasy boldy. Onyń kóterilip, zań jobasy retinde ázirlenip, úzdiksiz talqylanyp kele jatqanynyń ózine 2 jyldyń júzi toldy. Úkimettiń qorytyndysyn alýdyń ózine 1,5 jyldaı ýaqyt ketti. Qoǵamdyq dıalog alańdarynda da, Parlament qabyrǵasynda da keńinen talqylandy. Bul osy máseleniń asa ózekti ekendigin kórsetedi. Buǵan Memleket basshysynyń ózi birneshe ret arnaıy toqtalyp, ony aýyzdyqtaý jóninde naqty tapsyrma berdi», - dedi Májilis depýtaty Elnur Beısenbaev.

Onyń aıtýynsha, zań aıasynda qumar oıyndarǵa jáne bás tigýge qatysýǵa shekteý qoıylǵan adamdardyń tizimi anyqtaldy. Qumar oıyndarǵa ózine-ózi tyıym salýdyń merzimi bir jyldan 10 jylǵa deıin ulǵaıtyldy. Endi, ózine tyıym salynǵan merzimdi erte toqtatý múmkin bolmaıdy.

«Eger adam oınaǵysy kelse de, oınaı almasa, onda bul onyń jaýapkershiligi. Óıtkeni ol ózin-ózi shekteý qujatyna qol qoıǵan kezde barlyq zańdy mindettemelerdi sanaly túrde qabyldaǵan edi», - dedi depýtat.

Memlekettik qyzmetshiler, áskerı qyzmetkerler, arnaýly memlekettik organdardyń qyzmetkerleri, bıýdjettik uıymdardyń basshylary bás tige almaıdy. Bul shamamen 280 myń adam. Olarǵa eshqandaı eskertý bolmaıdy. ıAǵnı bás tikken jaǵdaıda birden jumystan shyǵarylady.

Munymen qosa, baılanys operatorlaryna qumar oıyndardyń jarnamasy bar habarlamalardy jiberýine tyıym salyndy. Sondaı-aq býkmekerlik keńseler men kazınolardy jarnamalaý barynsha shektelgen.

Lıtsenzııasy joq sheteldik býkmekerlik keńselerdiń, totalızatorlardyń ınternet resýrstaryna, onlaın-kazınolarǵa tyıym salyndy. Endi onlaın-kazınolardy uıymdastyrýshylardy 2 jylǵa deıin bas bostandyǵynan aıyrý jazasy eskerilgen, ıaǵnı qylmystyq jaýapkershilikke tartylady.

Buǵan deıin depýtat elimizde 400 myńdaı adam býkmekerler men kazınolardyń turaqty klıentine aınalǵanyn aıtqan edi.